1996: Emprima emprova
Ils onns novanta è l'idea d'aua minerala da Bravuogn cursada per l'emprima giada: Igl era planisà in project da 28 milliuns francs per trair a niz l'aua minerala a Bravuogn. Ils iniziants (en emprima lingia la firma Lepek da la Svizra franzosa) èn lu dentant bainspert sa decidids da reducir il project sin 12 milliuns francs. Pervia da differents problems cun la finanziaziun n'è il project betg gartegià.
2000: Firma tudestga senza success
La firma da bavrondas tudestga «Schlör» ha medemamain vesì grond potenzial en l'aua minerala da Bravuogn. L'onn 1997 avevan els entschet cun in project, che ha dentant fatg naufragi l'onn 2000. Il motiv: Problems cun las buttiglias d'emplenir l'aua.
2002: Investurs en praschun
Per passa quatter onns èsi stà ruassaivel enturn l'aua a Bravuogn. Alura hai dà ina ulteriura emprova: Ils dus frars Michael e Christian Burkhard da Son Gagl ed in investur da l'Austria han vulì vegnir cun l'aua minerala da Bravuogn sin fiera. Lur societad d'aczias ha dentant fatg concurs e la chaussa finescha avant dretgira: Ils dus frars vegnan arrestads e cunquai na va er la segunda emprova da nizzegiar aua minerala da Bravuogn betg en vigur.
2013: Ideas d'aua minerala messas ad acta
L'onn 2010 hai da novas speranzas: Ina gruppa d'investurs, tranter auter da Hongkong, vuleva construir ina nova fabrica d'emplenir aua en buttiglias sper la staziun da la viafier. La gruppa ha fundà ina societad d'aczias cun il num «Fontaunas d'aua Albula». Era la suprastanza communala aveva sustegnì l'entschatta il project da 40 milliuns francs.
Ord la realisaziun n'èsi era questa giada vegnì nagut: Il 2013 ha la suprastanza decidì da terminar quest project. Dapi lura n'han ins er betg pli ponderà vid in'ulteriura emprova da far in project pli grond a Bravuogn, sco il president communal Luzi Schutz ha ditg ad RTR.
RR actualitad 11.00