Tge è capità?
Ils 13 d'avust 2014 è in tren da la Viafier Retica collidà cun ina bova tranter Casti e Solis. La bova aveva bloccà il traject sin 15 meters. Dus vaguns èn siglids or dals binaris. L'emprim vagun è crudà sur la spunda giu ed è sa tschentà en plantas, radund 10 meters sut ils binaris.
En tut hai dà 11 persunas blessadas, 5 da quellas grevamain, las ulteriuras 6 eran sa blessadas be levamain. Las persunas èran vegnidas sguladas da la Rega en ospitals. Ina persuna è morta pli tard en l'ospital. En tut sa chattavan 140 persunas en il tren. Ellas eran vegnidas evacuadas a pe. En l'acziun gronda èn stads cumpigliads 60 pumpiers da l'entira regiun, 8 ambulanzas, 4 helicopters, 4 medis e la Polizia chantunala.
Or da l'archiv – curt suenter l'accident
Daco era la bova ida a val?
Il 2014 ha il manader dal Servetsch svizzer d'inquisiziun da segirezza (SUST), Philipp Türler, declerà a SRF ch'il terren sur ils binaris saja fitg stip e grippus. Radund 200 meters sur il traject dal tren saja sa furmà in depot da material cun terratsch, laina e crappa. Quel saja glischnà engiu pervi da la blera plievgia da las emnas avant. Il traject n'era betg registrà sco privlus, e durant 100 onns na saja schabegià nagut.
Il SUST ha intercurì il cas e constatà en il rapport final, dus onns e mez pli tard, che la bova n'è betg stada previsibla ed uschia era betg d'evitar. Problems haja dentant dà cun la rait da communicaziun – là dovria quai meglieraziuns.
Salvament dals vaguns
Ina da las grondas sfidas suenter l'accident è stà il salvament dals vaguns ch'èn siglids or dals binaris. Il vagun ch'era anc sin il traject han ins pudì metter cun tschaghegnas enavos sin las rodaglias. Ina sfida è stà il vagun 10 meters sut il traject. Per lez hai duvrà mesiras spezialas, sco il responsabel per l'infrastructura da la Retica Christian Florin ha ditg.
Las lavurs da lezzas uras
Consequenzas per la segirtad
Diesch onns pli tard sa regorda Christian Florin, ch'è anc adina responsabel per l'infrastructura tar la Viafier Retica, da quel temp. Ins haja discutà bler, tge ch'ins pudess far meglier, e co far pli segir il traject. Il rapport dal SUST haja mussà che la lavur da la Retica saja stada buna gia avant l'accident. I na saja betg stà pussaivel da prevesair la bova, il tren na saja betg stà memia spert ed era ils binaris sajan vegnids controllads curt avant l'eveniment. Quai ch'era impurtant avant, saja era restà impurtant suenter: survegliar consequentamain.
Ins n'haja pia tecnicamain midà nagut, di Christian Florin. Ils binaris vegnian era vinavant controllads mintg'emna a pe, en tscherts lieus hajan ins ina surveglianza electronica. Ed oravant tut sajan las infurmaziuns ch'els survegnian dals manischunz e da las manischunzas dals trens fitg custaivlas – quels vesian mintga di ils binaris.
Tge che restia vinavant imprevisibel saja la natira. Ins possia pia be controllar uschè bain sco pussaivel.