Era a Madris en Val d’Avras devi pli baud lufs. Quels vegnivan surtut l’enviern da la Bregaglia en il nord nua ch’els passavan la fracziun da Madris. Per mintga luf mazzà pajava la regiun Avras sis flurins (Gulden), sco ch’ins po leger en il cudesch dal pajais dal 1622. En la part sut da Madris, tar il «Chilchastück» tar l’aclaun «Bim Höjahus» sa chatta in vegl foss mirà, ch’è segirà cun ina saiv dad aissas. Là vegnivan pli baud tschiffads ils lufs che chaschunavan donns.
La trapla da lufs a Madris è la suletta trapla en il chantun ch’è anc existenta. Ella deriva probabel dal 17avel tschientaner. Il foss cun mirs radunds è circa 2,5 meters profunda, sisum datti plattas da crap.
Mantegnair la trapla istorica
La stad dal 2011 èn las cuvertas da crap da la trapla dal luf vegnidas cumplettadas, e messas sin il stan oriund. La terra che sa chattava en il foss è vegnida allontanada, ed en l’intern è vegnì chattà in palantschieu da crap. Ils mirs dal foss èn anc cumplettamain intacts.
