Atgnamain èsi stà tractandà, da votar davart il reservat da guaud natiral en la fracziun da Cresta. Il president communal Kurt Patzen ha però infurmà a la radunanza communala ch’ins na possia tuttina betg votar davart la fatschenta. La raschun saja che la vischnanca burgaisa haja gia ditg unanimamain na al project il december, cun 8 cunter 0 vuschs.
Acceptar decisiun
Uschia haja num, acceptar questa decisiun. Oriundamain ins haja pensà che la vischnanca politica cun il dretg d’utilisaziun dal guaud possia decider en chaussa, independentamain tge che la vischnanca burgaisa sco possessura dal guaud decidia. Ussa èsi però cler che omaduas partidas avessan stuì dir gea.
In giavisch dal chantun
Sin ina surfatscha da passa 50 hectaras, sin in’autezza tranter 1'820 e 2'200 meters sur mar sa chatta il Capettawold. In preproject da l’Uffizi da guaud e privels da la natira aveva previs da transfurmar il Capettawold en in reservat da guaud natiral. Tranter auter per avair dapli varietad da las spezias, far educaziun ambientala u era ademplir las pretaisas da FSC (certificaziun dal guaud). Il guaud saja plinavant adattà bain perquai ch’el na vegnia gia dapi ditg betg pli nizzegià da la selvicultura. Uschia na fissi tenor il chantun betg stà in disavantatg, sch’il guaud avess gì in scumond da pinar laina sco reservat da guaud natiral.
Approvà quint
Ultra da quai han las votantas ed ils votants d'Avras approvà unanimamain cun 30 cunter 0 vuschs il quint annual dal 2021. Quel serra cun in plus da prest 150’000 francs tar investiziuns nettas da radund 205’000 francs. Quest plus saja d’attribuir als tschains d’aua che sajan cun prest 730’000 francs bler pli auts che budgetà.