«Cun il cudesch dal piz digital vulain nus motivar la populaziun da scuvrir il bel mund alpin dal Grischun», ha ditg Martin Rust, il manader dal project da giubileum «GKB2020», envers il schurnal regiunal da Radio SRF.
Surses, Furna e Flem na vulan naginas tavlas
En tut haja la banca dumandà 70 vischnancas schebain ella possia montar las tavlas sin las muntognas. Mo da trais haja quai dà in na, e quai da Surses, Furna e Flem. A Puntraschigna per exempel na sajan ins betg stà intgantà da l’idea, ins na veglia betg che las muntognas vegnian «mobigliadas» cun tavlas. La fin finala hajan ils responsabels dentant decidì d'acceptar l’acziun. Quai sche las tavlas vegnian demontadas da la banca la fin da l’onn da giubileum, ha ditg il president communal da Puntraschigna Martin Aebli.
Betg tuts han plaschair da l'acziun
Tar las organisaziuns da l’ambient èn las opiniuns divididas. Fertant ch’il WWF e la Pro Natura acceptan l’acziun, datti critica da l’organisaziun per la protecziun da las alps «Mountain Wilderness». «Nus na beneventain betg il fatg che las davosas cuntradas da natira intactas vegnan malduvradas per reclama», ha ditg Maren Kern, la manadra da Mountain Wilderness envers Radio SRF.
RR actualitad 07:00