Uss pia ses emprim purtret en in vitg alpin dal Grischun. El duai mussar sin la paraid ils miraculs dal mund pitschen dal Parc Ela. Las lavurs han cumenzà glindesdi da quest’emna ed a fin duess l’ovra d’art sin la chasa istorica da l’onn 1591 esser la sonda, suenter 120 uras lavur. Malegià vegn cun colurs d’acril, agid survegn l’artist Patrick Wehrli alias REDL da ses ami Alex Hohl.
En tut è vegnì planisà diesch dis. Da vesair sin l’ovra d’art èn ina mattatscha da Beiva, muntognas da Beiva, sco era in’evla ed in capricorn. Sco quai che l’artist ha ditg envers RTR, saja bel da pudair far in’ovra en las muntognas Grischunas, nua ch’i saja pli frestg e betg uschè hectic sco per exempel a Hongkong.
Possessur è dalunga stà pront da laschar far l'ovra
L’ovra vegn ad avair ina grondezza da 10 sin 12 meters. Il possessur da la chasa è Othmar Jäger. El saja dalunga stà pront da laschar far questa ovra, ha el ditg envers RTR. Davart il motiv dal maletg ha el ditg ch’el plaschia.
L’ovra survegn ina lubientscha da trais onns, suenter sto quella puspè vegnir dismessa cun colur alva. Finanziada vegn l’ovra dals parcs natirals svizzers e da la Confederaziun. La vernissascha è la dumengia ils quatter d’avust durant la festa dal grip.
RR actualitad 17:00