En la naiv vegnan zuppads otg emetturs che simuleschan persunas ch’èn vegnidas en ina lavina. Sur in computer èsi pussaivel da programmar quantas persunas ch’ins vul tschertgar en la naiv. Suenter cumenza la tschertga cun in apparat da tschertgar disgraziads en lavinas LVS/ATDL. È l’emettur che simulescha ina persuna chattà, alura sto quel vegnir punctuà trais giadas cun ina sonda da lavinas e lura datti in signal acustic che signalisescha il success da la tschertga.
Beiva è adattà per in tal indriz
Sco quai che Andrea Ballat, la cassiera da l’uniun 7457 ha ditg saja Beiva predestinà per in tal indriz da trenament, cun quai che Beiva haja fitg blers skiunzs da tura. L’indriz vegn installà tar la staziun da mez Camon. Il diever da quest indriz è gratuit. L’uniun 7457 è vegnida fundada l’onn passà cun la finamira, da s’engaschar per la regiun e da crear novas purschidas. Enfin ussa ha l’uniun tranter auter realisà il Snowpark Beiva, e tar l’event «Surf Over» è l’uniun stada en il comité d’organisaziun. Cun quai che l’uniun consista mo da duas persunas per realisar pli spert projects, crodan davent las contribuziuns dals commembers. Tranter auter vegn l’uniun tar daners cun stampar textilias en il local da l’uniun a Beiva.
RR actualitad 17:30