Sco quai che Luzi Schutz, il president communal da Bravuogn Filisur ha ditg ad RTR, haja la vischnanca pir l’emna passada survegnì la nova, ch’il territori enturn l’areal da Bellaluna saja memia privlus per in festival cun enfin 5'000 visitaders.
Claudia Bieler da l’Uffizi da guaud e privels da natira ha confermà envers RTR, ch’ina valitaziun da privels haja mussà, che l’areal enturn Bellaluna na saja betg adattà per in festival da questa dimensiun – surtut pervi dad urizis che pon vegnir fitg spert, cun la consequenza che bovas da glitta e glera pon er vegnir fitg spert. Ed il privel exista che las bovas vegnan fin sin l’areal da festa.
Salvà il festival l'ultima minuta
Quasi la davosa minuta ha la vischnanca da Bravuogn Filisur anc pudì reagir – las lavurs dad eriger il champ per ils bun 100 gidanters a Bellaluna avevan gia cumenzà. Ussa ha l’entir festival lieu pli enavant en direcziun da Filisur. Quai saja ina soluziun sub-optimala, ha ditg Luzi Schutz. La raschun è ch’i vegn a dar dapli canera per ils abitants da Filisur durant il festival. El spera e quinta dentant cun la bainvulientscha da la populaziun, perquai ch’il festival saja economicamain ed era turisticamain fitg impurtant per la vischnanca.
Venderdi vegn la populaziun anc infurmada en detagl cun in fegl sgulant. Ils abitants da Bravuogn e Filisur pon ir gratuit al festival, bigliets datti sin la chanzlia communala.
RR actualitad 07:00
