Siglir tar il cuntegn

Header

video
Generaziuns han dà vinavant istorgias, anecdotas e dialects d’in vitg
Or da Telesguard dals 04.05.2022.
laschar ir. Durada: 4 minutas 13 Secundas.
cuntegn

«Beverin Interviews» In banc dal vitg digital

Las istorgias, ils dialects e las atgnadads dals singuls vitgs vegnivan barattadas pli baud sin ils bancs dal vitg. Quest dar vinavant va ozendi pli e pli a perder. Per far frunt a quest trend datti uss in nov project en la regiun dal Parc natiral Beverin.

Casper Nicca viva gia sia entira vita en la Val Schons. El tutga anc tar quels paucs ch'ins entaupa mintgatant sin ses banc avant isch-chasa a Casti. Savens sesa er il pli vegl abitant dal vitg, Dumeni, sper el e raquinta istorgias da pli baud. Ma – er el emblida adina dapli. E cunquai ch'ils discurs sin ils bancs dal vitg èn insatge che daventa adina pli rar, na vegnan questas istorgias, ils dialects e las atgnadads dals vitgs betg pli dads vinavant e van pli e pli en emblidanza.

Per franar in zic quest trend ha Casper Nicca vulì far insatge. Ed uschia ha il cineast prendì sia camera ed ha cumenzà avant in pèr mais a visitar la glieud en ils vitgs da la regiun. Il Parc natiral Beverin sustegna quest project. E sche Casper Nicca è lura tar la glieud - lascha el simplamain raquintar da la vita da mintgadi e da pli baud. Quai er sche quellas anecdotas ed istorgias paran forsa simplas ed ordinarias. Quai è exact quai ch'interessescha il cineast e ch'el vul mantegnair.

L'entir project cuzza tschintg onns. En quest temp vul Casper Nicca registrar videos cun da tutta sorts glieud, far fotografias, in podcast e forsa schizunt in cudesch. La finamira è da crear ina sort banc dal vitg digital – ed uschia porscher in mund virtual per tadlar tiers e per mantegnair almain ina part da tut questas istorgias che vegnan scrittas en ils vitgs.

RTR Telesguard 17:40

Artitgels legids il pli savens