Sonda la damaun, il tschiel è surtratg, il vent suffla. Tuttina è la plazza da parcar da la pendiculara Rothorn a Vaz bain emplenida cun autos e campers da tut la Svizra e l'Europa. Suenter ch'ils umens, dunnas ed uffants èn sa preperads per il di stattan els en colonna tar la pendiculara. Strusch in dad els trapligna sez si da la muntogna.
Ils blers da quellas e quels che stattan en lingia n'èn betg qua per l'emprima giada. Els stiman la purschida gronda, ils differents tracks e la grondezza dal territori, che gida da derasar la blera glieud. Las midadas dals davos onns sajan grondas.
Pli baud stuevan ins anc sez pedalar ensi, oz prendan ins la pendiculara. Tut è vegnì pli grond, bunamain sco in Disney-Land.
Blera glieud hai, malgrà che l'aura n'è betg propi bella quest di. Pli datiers che la pendiculara vegn a la staziun sin 1'900 meters, pli spess che la tschajera vegn. «Aura sco a chasa», manegia in biker da l'Engalterra. La vista tanscha è be intgins meters lung.
Per vegnir ord la tschajera datti anc ina segunda pendiculara. Quella maina sin 2'800 meters sur mar, sin il Rothorn da Parpan. Mintgamai 12 persunas e lur bikes han plaz en la cabina. Er qua èsi per part da star en lingia. Per il persunal è chargiar velos en la cabina bunamain l'incumbensa ch'els fan il pli savens.
Dador la staziun finala sa prepara in pèrin per pigliar il trail en direcziun Arosa. Gist quellas vias lungas plaschan ad els dus. «Quellas vias na sajan er betg uschè fullanadas», manegia l'um. Suenter in'ultima controlla dal bike partan els. Ins auda anc in pau co ch'ils frains tschivlan. In curt mument èsi quiet, fin che la cabina cun ils proxims bikers arriva.
