Siglir tar il cuntegn

Header

cuntegn

Bivio Brassaria fa café sin 1'769 meters sur mar

Dapi la stad passada datti ina pitschna brassaria en l’anteriura posta da Bivio. Il café vegn brassà cun café che deriva da la Guatemala, l’India e la Brasilia. En media fa la brassaria da Bivio tranter 300 fin 500 kilos café il mais. Ed ella venda quel ad hotels ed a butias da Bivio e dal Surses.

Fatg vegn il café da l’allrounder Jasper Konijenberg, ch’è oriund da l’Ollanda. El ha lavurà intginas stagiuns sco camarier a Bivio, la vischnanca enconuscha el da las vacanzas da skis da sia uffanza. El è responsabel per tut, vul dir il brassar il café, far il marketing, e trametter e vender il café a ses clients.

Sco quai che Jasper Konijenberg ha ditg, fetschia el il café il mument cun ina pitschna maschina da brassar. Mintg’ura dettia quai radund sis kilos. Sch’ils affars marschian bain en l’avegnir, veglia la «Bivio Rösterei GmbH» en l’avegnir cumprar ina maschina pli gronda cun dapli capacitad. Cun la pitschna saja l’idea, da far en l’avegnir workshops da brassar café.

Far café a Bivio è auter che giu la Bassa

Emprendì da far café ha Jasper Konijenberg en in curs en il Principadi da Liechtenstein. Far café a Bivio sin in’autezza da 1'769 meters sur mar saja ina sfida, cun quai ch’il dretg mument saja sin quest’autezza in’auter ch’en la Bassa. Ussa, prest in mez onn suenter ses emprim café brassà, saja la qualitad sin in fitg bun stan.

Il manader da fatschenta da la brassaria da Bivio è Pascal Uffer, ch'ha gì ina funcziun da cader tar l’interpresa Selecta. El viva en la Bassa ed ha ragischs en il Surses.

RTR actualitad 11:00

Artitgels legids il pli savens

Scrollar a sanestra Scrollar a dretga