Els legrian fitg da suenter quatter onns puspè pudair manar tras l’occurrenza culturala ch’ha lieu la terza giada, ha ditg Gian Rupf, il manader dal festival. Pervi da corona ha il festival stuì vegnir annulà l’ultima giada.
Vast program
Al festival datti concerts, films, prelecziuns e discussiuns da podi. Lantschà vegn il festival gia la gievgia saira, il di avant ascensiun. Quai cun in concert dals Fränzlis da Tschlin. Enfin ussa sajan gia vegnids radund 350 bigliets en la prevendida, ha ditg Gian Rupf. La finamira saja d’attrair 1200 fin 1500 visitadras e visitaders a Bravuogn. Da visitar tut las occurenzas na saja betg pussaivel, di il manader dal festival. En tut èn 50 artistas ed artists da la partida. La lingua rumantscha vegnia er integrada en il Festival, i dettia adina puspè programs rumantschs.