Il plan prevesa il suandant: Or da l’uniun Bravuogn Filisur Turissem ed ils Implants da sport Bravuogn SA duai dar ina nova societad acziunara. Grazia pauschalas empè d’ina taxa da cura, duessi dar en l’avegnir entradas supplementaras d’enfin 200’000 francs ad onn. Il sboz da la lescha è pront e va proximamain en consultaziun. Votà davart la nova lescha duai vegnir anc la primavaira u la stad, en vigur duess la nova lescha cun las novas structuras ir l’entschatta da l’auter onn.
Critica da l’uniun dals possessurs da segundas abitaziuns ALB
Dieter Imboden, commember da l’uniun ALB na va betg d’accord cun la nova lescha. El sa disturba surtut davart il fatg, che possessuras e possessurs da segundas abitaziuns, duessan pajar dapli per lur abitaziuns pervi da las pauschalas empè da la taxa da cura. Luzi Schutz, il president communal da Bravuogn Filisur ha ditg envers RTR, ch’i saja impurtant dad avair en avegnir dapli entradas per il turissem. Perquai che oz saja il turissem sutfinanzià, quai sajan custs che la vischnanca stoppia pajar. Dieter Imboden, ch’è stà en suprastanza da Bravuogn Filisur Turissem dapi il 2018, ha desditg ses uffizi avant duas emnas. El na saja betg vegnì piglià serius en il gremi, e cun la nova lescha da turissem na possia el betg s’identifitgar.