Che Luzi Schutz na vul betg pli candidar sco president communal ha el gia communitgà l'onn passà. Sco motiv ha el numnà ch'i manchia l'energia e la motivaziun per in'ulteriura perioda d'uffizi. Schutz è vegnì elegì l'emprima giada il 2017. Dapi la fusiun presidiescha el la vischnanca da Bravuogn Filisur.
Sco quai che la vischnanca communitgescha en il fegl uffizial, n'èsi dentant betg mo il president Luzi Schutz che na vul betg pli candidar, mabain gist l’entira suprastanza (Rico Florinett, Johannes Schmid, Jana Cavelti e Madleina Schutz Madeira Afonso). Ed er l’entira cumissiun da gestiun na sa metta betg pli a disposiziun per la proxima legislatura. Che tut quels na vulan er betg pli candidar haja differents motivs, ha ditg Luzi Schutz envers RTR. L'atmosfera en la suprastanza na saja dentant betg in da quels.
Nus avain anc adina ina fitg buna atmosfera en la suprastanza.
Quai che haja dentant procurà per discussiuns saja stada la paja e las incumbensas. Lezzas na sajan betg stadas uschè cler definidas. Là sajan ins dentant gia londervi, di Schutz. Cun agid extern sajan ins gia in temp vi da definir pli cler las incumbensas e las indemnisaziuns per far pli attractiv la lavur.
Nus stuain ir sur ils cudeschs e definir pli cler las incumbensas e las indemnisaziuns.
La finamira saja d'avair terminà questa lavur fin las elecziuns l'atun che vegn, uschia ch'i saja cler per ils novs candidats e candidatas tge che spetga els. Actualmain survegn il president communal 48'000 francs ad onn ed ils commembers e commembras da la suprastanza 11'000 francs ad onn.
Discussiuns davart novs candidats e candidatas
Las discussiuns davart novas candidatas e candidats hajan gia cumenzà l'onn passà, di Schutz. Perquai che gia lura saja sa mussà ch'i vegnia a dar plirs sezs d'occupar da nov. Uschia hajan ins gia lura installà ina cumissiun cun l'incumbensa da chattar novas candidatas e candidats.
La pli gronda sfida vegn ad esser da chattar in president. Davart tschels uffizis na fatsch jau betg quitads.
Fin ussa è enconuschenta pir ina candidatura uffiziala per la suprastanza communala: Remo Hugentobler da Bravuogn. Ulteriuras candidaturas pon vegnir annunziadas a la chanzlia communala. Ina candidatura uffiziala n’è betg per forza necessaria.
Elecziuns èn l’atun
Ils 27 da settember 2026 vegn elegì l’emprim il presidi communal. Il pli tard quatter emnas pli tard, ils 25 d’october 2026, suondan las elecziuns per quatter commembers da la suprastanza communala, trais commembers da la cumissiun da gestiun, dus commembers da l’autoritad da construcziun sco er dus commembers dal cussegl da scola. Sch’i duvrass in segund scrutini per il presidi communal, avess er quel lieu ils 25 d’october.