L’analisa ha mussà che Bravuogn Filisur è ina pitschna destinaziun turistica che stoppia guardar fitg bain sin ils daners e che quels vegnian nizzegiads effizient. Il mument datti trais organisaziuns. Quai èn la vischnanca da Bravuogn Filisur, l’uniun Bravuogn Filisur Turissem ed ils Implants da Sport da Bravuogn. E qua dettia diversas fricziuns. Perquai datti trais propostas:
- Metter tut quai ch’ha da far cun il turissem en ina organisaziun. Quai vul dir fusiunar ils Implants da Sport ensemen cun l’uniun da turissem. Era las lavurs da la vischnanca duain ir en questa organisaziun, che duai avair num Visit Val Alvra SA. Questa societad anonima na duai betg vegnir fundada da nov, la Societad anonima existenta Implants da sport Brauogn SA suai simplamain survegnir da nov quest num. La vischnanca da Bravuogn Filisur duai sa participar cun 30% vi da la societad anonima.
- Plinavant duai vegnir fatga ina nova lescha da turissem tenor il muster dal chantun Grischun. La taxa da cura na duai betg pli vegnir pajada per notg mabain per letg u per abitaziun cun ina pauschala annuala.
- Sco terz element èsi planisà da generar 150’000 fin 200’000 francs dapli che oz ad onn. Quels daners duain vegnir mess en ina finanziaziun speziala per far projects turistics per il futur. Era per il cas che la nova societad anonima avess ina giada da vegnir en stretgas finanzialas, pudessan quels daners vegnir duvrads.
Ils abitants e possessurs da segundas abitaziuns pon a partir d’immediat sa participar vi d’ina enquista nua ch’els pon s’exprimer envers las ideas preschentadas. La votaziun davart la nova lescha da turissem è planisada il november da quest onn. Tar in gea duai quella ir en vigur l’emprim da schaner 2022.