Quatter commembers vertents da la suprastanza communala han annunzià lur demissiun per la fin da la perioda d’uffizi currenta. Uschia vegnan plirs sezs occupads da nov. Per la suprastanza communala datti trais candidats: Remo Hugentobler, Roger Zysset e Jannik Ehinger. Ulteriuras candidaturas pon vegnir annunziadas a la chanzlia communala. Ina candidatura uffiziala n’è betg per forza necessaria, cunquai che mintga persuna cun dretg da votar po vegnir elegida en in’autoritad communala. Tuttina supplitgescha la vischnanca persunas interessadas d’annunziar ordavant lur candidatura per facilitar l’infurmaziun da la publicitad.
Anc nagin canditat u candidata per il presidi
Ch'el na na vul betg pli candidar sco president communal ha Luzi Schutz gia communitgà l'onn passà. Sco motiv ha el numnà ch'i manchia l'energia e la motivaziun per in'ulteriura perioda d'uffizi. Schutz è vegnì elegì l'emprima giada il 2017. Dapi la fusiun presidiescha el la vischnanca da Bravuogn Filisur.
Sper il president e la suprastonza communala hai anc dà ulteriuras demissiun. Er l’entira cumissiun da gestiun na sa metta betg pli a disposiziun per la proxima legislatura. Che tut quels na vulan er betg pli candidar haja differents motivs, ha ditg Luzi Schutz envers RTR. L'atmosfera en la suprastanza na saja dentant betg in da quels.
Nus avain anc adina ina fitg buna atmosfera en la suprastanza.
Quai che haja dentant procurà per discussiuns saja stada la paja e las incumbensas. Lezzas na sajan betg stadas uschè cler definidas. Là sajan ins dentant gia londervi, di Schutz. Cun agid extern sajan ins gia in temp vi da definir pli cler las incumbensas e las indemnisaziuns per far pli attractiv la lavur.
Nus stuain ir sur ils cudeschs e definir pli cler las incumbensas e las indemnisaziuns.
La finamira saja d'avair terminà questa lavur fin las elecziuns l'atun che vegn, uschia ch'i saja cler per ils novs candidats e candidatas tge che spetga els. Actualmain survegn il president communal 48'000 francs ad onn ed ils commembers e commembras da la suprastanza 11'000 francs ad onn.
La dumengia, ils 27 da settember 2026 vegn elegì l’emprim il presidi communal. Per quest post na datti anc nagina candidatura uffiziala. Il pli tard quatter emnas pli tard, ils 25 d’october 2026, suondan las elecziuns dals ulteriurs commembers da las autoritads, pia trais commembers da la cumissiun da gestiun, dus commembers da l’autoritad da construcziun sco er dus commembers dal cussegl da scola. Sch’i duvrass in segund scrutini per il presidi communal, avess er quel lieu ils 25 d’october.
President dapi la fusiun
Luzi Schutz è vegnì elegì l’ onn 2017 per l’emprima giada sco president communal da Bravuogn Filisur, suenter ch’el ha gudagnà cunter Stephan Mettier. Dapi la fusiun da las anteriuras vischnancas Bravuogn e Filisur maina el la vischnanca fusiunada dapi che quella è ida en vigur l'emprim da schaner da l'onn 2018.