Bravuogn - Museum vul bajegiar viafier da model per 1,1 milliuns
Sin radund 4'000 meters quadrats vul il Museum da viafier a Bravuogn bajegiar ina viafier da model en il liber. Dals 1,1 milliuns francs budgetads, èn dus terzs gia segirads. L’atun duess la vischnanca Bravuogn Filisur decider davart ina midada da zona necessaria.
Vegnir construida duai ina viafier da model cun cuntrada. Ils trens dal tip Lehmann-Gross-Bahn LGB (mesira 1:22,5) duessan circular sur viaducts sco quel dal Landwasser, quel da Solas u da Tagn/Wiesen. Era la viafier dal Bernina e quella d’Arosa duain vegnir realisadas. En funcziun duess la viafier vegnir durant ils mais da stad ed atun. Realisà duess tut vegnir gist visavi dal museum existent.
1 / 7
Legenda:
Gist visavi dal museum existent duai dar la viafier da model.
Museum Viafier Bravuogn
2 / 7
Legenda:
Ina skizza cun ideas co che tut duai vesair ora.
Museum Viafier Bravuogn
3 / 7
Legenda:
Sin quests binari vid duai vegnir ina locomotiva gronda, e gist davos duai vegnir construì il paradis per ils fans da la viafier.
RTR, Federico Belotti
4 / 7
Legenda:
Da quels trens, en questa grondezza duain cursar or en il liber.
RTR, Federico Belotti
5 / 7
Legenda:
Roman Sommer, il president dal Museum da Viafier Bravuogn.
RTR, Federico Belotti
6 / 7
Legenda:
Da quels trens, en questa grondezza duain cursar or en il liber.
RTR, Federico Belotti
7 / 7
Legenda:
Sin quest prà vul il Museum da viafier Bravuogn construir la viafier da model cun cuntrada, viaducts e tunnels.
RTR, Federico Belotti
Avertura il 2024
Sco quai che Roman Sommer, il president dal Museum da Viafier ha ditg envers RTR, quintian ins da pudair avrir la nova attracziun l’onn 2024. El saja da buna speranza, ch’i gartegia era da recaltgar il davos terzs dals daners d’investiziun che manchian. Ils daners duain derivar da donaziuns, fundaziuns e daners dal maun public. Il Museum da Viafier Bravuogn festivescha quest onn ses giubileum da 10 onns. La fin d’emna dals 19 fin ils 21 d’avust datti in program festiv.
