Siglir tar il cuntegn

Header

cuntegn

Brinzauls Chanals da drenascha cuntentan

Il sistem da drenascha ch'è vegnì construì avant dapli che 100 onns e renovà la davosa giada il 1976 è ussa pront e funcziuna bain. Las lavurs sin las aclas da Propissi sur Brinzauls sut il Piz Linard èn uschia a fin. Uss èn tut ils chanals sin ina lunghezza da 3,8 kilometers vegnids fatgs da nov.

audio
Brinzauls: Emprimas experientschas cun drenaschas
ord Actualitad dals 27.08.2021.
laschar ir. Durada: 1 minuta 53 Secundas.

Er passa 100 onns suenter la construcziun cuntenta il sistem da drenascha la glieud responsabla. Andreas Huwiler, geolog da l'Uffizi da guaud e privels da la natira è cuntent da mintga liter aua che na cuntanscha betg la vischnanca ed uschia la zona che glischna. Las mesiraziuns dal matg cun 230 liters la minuta e quellas da zercladur cun 130 liters la minuta sajan uschia sco spetgadas.

Ils chanals cun ina lunghezza da 3,8 kilometers èn tuts vegnids fatgs da nov. Els passan en il liber e betg pli sut terra.

La gronda speranza

Il matg han cumenzà las lavurs da construir in tunnel da sondagi. Il mument vegn preparà tut per pudair cumenzar a construir il tunnel a partir da settember. Emprims resultats vegnan spetgads la primavaira 2023. Il tunnel da drenascha en grondezza d'in tunnel da viafier custa bun 10,5 milliuns francs e duess lura avair ina lunghezza da passa 600 meters.

En il cas che las mesiras menziunadas han success, duess il tunnel vegnir prolungà pli tard, ed il tunnel duess daventar in tunnel da drenascha fix. Cun las mesiras speran ils geologs da pudair franar ils ferms moviments dal «Rutsch» da Brinzauls.

RTR actualitad 12:00

Artitgels legids il pli savens