Sur Brinzauls sa mova la spunda puspè in zic pli svelt. Sco quai che la vischnanca d'Alvra ha communitgà saja quai pervia da la plievgia da las emnas passadas. La spunda reageschia pli sensibel sin plievgia. Er il vitg sa mova pli svelt, actualmain cun 1,15 meters per onn.
Dapi il 2018, cura ch'ins ha cumenzà da mesirar, possia ins observar ch'il moviment vegn pli svelt cun la plievgia l'atun. La situaziun na saja pia betg alarmanta. In'ulteriur moviment pon ins mesirar tar il dies cun guaud da chaltgeras, sin la vart da la costa cunter Vazarouls.
Aua en il funs
Sur il vitg en il territori d'Armauns giascha in grond deposit da crappa e glera, che cuntegn bler aua. Pervia d'autras furmaziuns geologicas na possia l'aua betg currer giu, di il biro da geologia BTG che cusseglia la vischnanca d'Alvra. Ina perfuraziun possia gidar da laschar currer giu questa aua.
Ch'ils tunnels da drenascha funcziunian, mussia il moviment dal vitg ed il funs sut la costa. Las perfuradas mussian in effect fin il plateau. Ch'il moviment vegn puspè pli svelt, è tenor ils geologs uschia perquai ch'i entra dapli aua che possia extrar tras ils tunnels.
Tenor il bulletin possian las perfuraziuns cuntinuar il mars 2024. Fin il 2027 duain las 100 perfuraziuns esser fatgas dal tut. Avant ch'i vegn cuntinuà, documentescha in biro d'inschegners independent la cundiziun da tut ils bajetgs a Brinzauls sin incumbensa da la dretgira regiunala Alvra.
