Bun e baud cumenzament per ils avieuls grazia a primavaira chauda
- Actualisà Gievgia, 20.4.2017, 6:54
Ils avieuls sajan baud londervi quest onn, ma quai na saja betg ina situaziun extraordinaria, di l'apicultur da Savognin Rinaldo Uffer. Sch'i schela u naiva dentant, saja da guardar ch'els hajan avunda pavel. Uschiglio pudessi bittar enavos els.
-
Ils avieuls èn gia fitg lavurus. RTR, Gion Gieri Flepp
1/6 -
Ils avieuls en baud londervì quest onn: Anc betg il grond travasch ma tuttina gia in pau traffic avant ina masaina cun otg pievels da Rinaldo Uffer. RTR, Gion Gieri Flepp
2/6 -
Rinaldo Uffer da Savognin è gia dapi bunamain 45 onns apicultur passiunà. RTR, Gion Gieri Flepp
3/6 -
Endadens è gia tut pront per cumenzar la nova stagiun. RTR, Gion Gieri Flepp
4/6 -
Rinaldo Uffer controllescha in pievel ch'è londervì da far cuada. RTR, Gion Gieri Flepp
5/6 -
Er davent da la masaina pitschna da l'apicultur da Savognin sgolan ils avieuls gia frequentamain. RTR, Gion Gieri Flepp
6/6
-
1 Bunura: La pissiun è anc memia gronda per chalar 3:16 min
-
2 Bunura: Ils avieuls han gì in bun start 3:16 min
I haja adina puspè dà tals onns, nua ch'ils pievels eran baud ferms ed hajan cumenzà baud a lavurar, di Rinaldo Uffer ch'è prest 45 onns apicultur passiunà. L'enviern na saja betg stà nausch per ils avieuls. Da ses 22 pievels haja el pers be trais, quai saja pauc. Ma er sch'ils pievels sajan gia uss ferms ed activs, saja quai anc da spetgar cun metter en las patgnas per far mel.
Schelira e naiv èn in privel – avunda pavel è impurtant
Il mender per ils avieuls suenter uschè in bun cumenzament sco quest onn saja, sch'i vegnia anc ina giada naiv u sch'i schelia. Lura saja da guardar ch'ils avieuls hajan avunda pavel per surmuntar ils dis da fradaglia. Uschiglio na mettia la regina nagins ovs pli ed i dettia ina lucca en il pievel. Quai possia bittar enavos ferm in pievel, uschia Rinaldo Uffer. In pievel che saja baud ferm dovria fin in kilo pavel per di.
Aura decida sch'i dat ina buna stagiun u betg
Sch'i fetschia il matg chaud e bun'aura cun tranteren ina plievgia, lura manegia l'apicultur da Savognin ch'i dettia in bun onn. Il meglier fiss sche la plievgia vegniss mintgamai be la notg. Lura pon ils avieuls numnadamain gist cumenzar a sgular la damaun suenter la plievgia.
RR actualitad 08:00