Il camiunist rumen, che lavura per ina firma da transport svizra, ha vulì charrar cun ses camiun-tractor da Casti a San Murezzan sur il pass da l'Alvra. Per lez datti pliras signalisaziuns pertuccont restricziuns. Malgrà ch'el ha surpassà la ladezza maximala da 2,3 m, l'autezza maximala da 3,3 m, la paisa maximala da 18 tonnas ed il scumond da charr annex per vehichels grevs, saja il manischunz charrà vinavant. Vers la polizia ha el inditgà d'esser charrà tenor il sistem da navigaziun. Avant las tschintg la saira è el restà bloccà a Preda pervi d'in defect tecnic.
Via dal pass serrada durant pliras uras
Il pass da l'Alvra è vegnì serrà per il traffic da transit. Suenter las 20:00 uras ha la polizia chantunala pudì manar sperasvi il traffic d'autos sin in vial. In servetsch da depannagi ha lura avant las 22:00 uras salvà il camiun defect ed er manà enavos a Bravuogn il charr annex. Las 23:00 ha la polizia pudì avrir il pass da l'Alvra.
Il manischunz dal camiun ha stuì pajar 1'000 francs sco depot da multa.
RR novitads 06:00