Pliras giadas ha la vischnanca da Surses fatg attent las Pendicularas da Savognin, ch’ils quints per l’electricitad dal campadi ston vegnir separads cun mussar il pretsch d’electricitad ed il pretsch per l’infrastructura. Quai han ellas fatg. L’electricitad custa vinavant 45 raps per ura kilowat, da quels van però 28 raps sin l’infrastructura. Quai saja memia bler, ha ditg il giurist da la revista «Beobachter» Daniel Leiser envers RTR.
Quai è malgist e na correspunda betg al dretg da locaziun.
Sch’il campadi veglia metter a quint ils custs da l’infrastructura lura stoppia quai succeder sur il pretsch da locaziun per il plaz. Cun il sistem actual profitia il gestiunari dal campadi dapli da las persunas che dovran dapli energia che da quellas che dovran pli pauca energia. Cun quai che l’infrastructura saja però per tuts la medema, saja quai malgist e na correspundia betg al dretg da locaziun Svizzer, uschia Daniel Leiser.
Differentas opiniuns
Auter vesa quai Josef Willi, il president da la federaziun Svizra da Campaing e Caravaning SCCV. Tenor el sajan ils pretschs per l’electricitad dal campadi a Savognin betg exagerads. Ils custs per l’electricitad sin campadis svizzers sajan en media enturn 50 raps per ura kilowatt - il pretsch da Savognin saja schizunt bas, manegia il president.
Pendicularas taschan
Las Pendicularas da Savognin che mainan il campadi Gelgia a Savognin, na vulevan betg prender posiziun en chaussa.
I sa tractia d’ina chaussa tranter la famiglia Cotti e las pendicularas. La famiglia Cotti aveva fatg attent las medias ch’ella na veglia betg acceptar il pretsch per l’electricitad memia aut dal campadi.