Siglir tar il cuntegn

Header

audio
Casti: Auto da l'ester è dapi mais sin in parcadi
Or da Actualitad dals 21.01.2022.
laschar ir. Durada: 4 minutas 54 Secundas.
cuntegn

Casti In auto tschertga ses possessur

Gia dapi passa quatter mais è in auto parcà dasper la via principala a Casti. Il possessur da l’auto franzos è sparì. Ussa sto la vischnanca Albula/Alvra s’occupar cun l’auto bandunà. E magari era pajar ils custs per dismetter l’auto ch’ha gì ina panna.

La polizia ha supplitgà il possessur da l'auto d'allontanar quel dal spazi public. Cunquai ch'il possessur n'ha betg reagì sin la dumonda, è ussa la vischnanca responsabla. Quai saja definì en l’Ordinaziun chantunala davart la protecziun da l’ambient, ha ditg la Polizia chantunala envers RTR.

Ussa è la vischnanca d'Alvra responsabla

Uschia ha la vischnanca d'Alvra scrit quest’emna al possessur da l’auto d’allontanar il vehichel. Sch'el na fa betg quai, vegn l’Uffizi per la natira e l’ambient a dar in davos termin al possessur da l’auto. ll medem mument vegn admonì cun in chastì. Resta l’auto vinavant en il spazi public, vegn quel allontanà sin custs dal possessur. È quel insolvent, sto la vischnanca pajar il quint.

820.110 Ordinaziun chantunala davart la protecziun da l'ambient

Avrir la box Serrar la box

Art. 19
2. admoniziun, execuziun d'uffizi
1
Sche vehichels ord diever u singuls elements da quels, spezialmain pneus, vegnan laschads or en il liber sin terren public u privat, envida la vischnanca la possessura u il possessur d'allontanar l'object tenor lescha entaifer in termin adequat. Sche la vischnanca na s'occupa betg da la chaussa, succeda l'invitaziun tras il post spezialisà.

2
Sch'i na vegn betg dà suatientscha a l'invitaziun, infurmescha la vischnanca il post spezialisà. Quel fixescha in ultim termin per l'allontanament cun smanatschar il medem mument in chasti ed ina execuziun d'uffizi sin donn e cust da la possessura u dal possessur. Suenter ch'il termin è scrudà senza ch'i saja vegnì fatg diever dad el, ordinescha il post spezialisà l'execuziun d'uffizi ed adossescha ils custs a la possessura u al possessur.

3
Sch'ins na po betg eruir la possessura u il possessur ubain sche quella u quel è insolvent, vegnan ils custs adossads a la vischnanca.

4
L'obligaziun d'allontanar l'object scroda, sch'ils vehichels ord diever u sch'ils elements da quels n'èn betg ruments.

 

L'auto bandunà ils 16 da schaner 2022.
Legenda: L'auto bandunà ils 16 da schaner 2022. Federico Belotti

RTR actualitad 12:00

Artitgels legids il pli savens

Scrollar a sanestra Scrollar a dretga