Sco quai che la vischnanca Alvra e la Viafier retica han communitgà a la radunanza communala, ins saja il mument sin il livel d’in preproject. Quel prevesa da far ina staziun per ils autos da posta là nua ch’èn oz ils parcadis da la staziun. Per ils autos da posta duessi dar ina plazza per volver, tge che saja bun per la segirtad hai gì num. Ils parcadis che van a perder, duessan vegnir construids da l’auter maun da la staziun. Quels vegnan ad esser cuntanschibels cun in sutpassadi, oz ha la staziun da Casti anc nagin. Grazia ad in sutpassadi daventia era la situaziun per ils passagiers pli segira, ed era la stabilitad da l’urari profitia, perquai ch’ils trens possian entrar da dus mauns il medem mument. Cun construir novs perruns pli auts per ils trens, ed in terminal cun perruns auts per ils autos da posta, vegnia era ademplida la lescha per l’egualitad da persunas cun impediments. Il preproject na prevesa anc nagut en l’anteriur bajetg da la posta. Là vul il Parc Ela construir in center per visitaders, ed era la vischnanca Albula/Alvra ch’è en possess da la chasa, pudess nizzegiar l’immobiglia per l’agent intent.
Plan da termins
Anc quest onn duess il suveran da la vischnanca Albula/Alvra decider davart in credit. Quant ch’il project custa e quant che la vischnanca e la Viafier retica pajan, n’è per il mument betg anc cler. Datti in Gea a favur dal project, alura duess vegnir fatga la dumonda al chantun per in sustegn finanzial per la vischnanca. Las lavurs da construcziun duessan cumenzar l’onn 2027 e vegnir terminadas l’onn 2029.
Decisiuns da la radunanza communala
Sper l'infurmaziun davart ils plans per la nova staziun ha il suveran decis a la radunanza communala:
- Per sanar la via da la staziun, construir in trottuar e modernisar lingias d’aua ed electric, è vegnì concedì in credit da 400’000 Francs.
- Per l’utilisaziun dal guaud a Mon, è vegnì concedì in credit da 4,6 milliuns francs. Las lavurs duessan cumenzar questa stad.