Siglir tar il cuntegn

Grischun Central Caverna per il lai da fermada da Marmorera

En l'avegnir sto era il lai da fermada da Marmorera dar giu aua restanta. Per quest intent vegn a partir da questa stad siglientada ina caverna en il mir da fermada, per installar là ils indrizs tecnics per dosar la pressiun da l'aua. Il project custa radund dus milliuns francs.

Il project d'exposiziun da las Ovras electricas da Turitg.
Legenda: Il project d'exposiziun da las Ovras electricas da Turitg. RTR - Grafica

La caverna vegn ad avair ina grondezza da 1'200 meters quadrat. Ella ha era spazi per ina turbina che las Ovras electricas da Turitg EWZ vulan endrizzar sch'i dat daners dal program dal KEV (indemnisaziun per cuvrir ils custs da la furniziun d'electricitad).

Fin 400 liters la secunda per la Gelgia

L'aua che vegn en l'avegnir a cular en la Gelgia, vegn a sortir entras bischens ord la svidera da fund existenta. Igl è previs che 200 fin 400 liters la secunda vegnan ad ir en la Gelgia. La regenza ha approvà il project. Il mument è quel exponì tar l'uffizi d'energia e traffic. Sche tut va tenor plan, vul la EWZ terminar cun las lavurs en il decurs da la stad 2019. La EWZ è obligada da laschar cular aua en la Gelgia. Il mument vegn tut l'aua dal lai da fermada da Marmorera duvrada per la producziun d'electricitad.

RR actualitad 07:00