Sco quai che Peter Mosimann, il cussegliader dal chantun da la firma WNT inschigniers ha ditg envers RTR, na sajan tranter auter la clinica Beverin e la praschun Tignez il mument betg protegids bain avunda cunter auas grondas. Las mesiras vegnian dentant fatgas per eveniments d’aua gronda che possian capitar mintga 100 fin 300 onns. Cun dar dapli spazi a l’aua giaja a perder in pau funs. Cumpensà vegnia quai per ina part entras ina via che na vegnia betg pli duvrada e vegnia renaturalisada.
Project vegn publitgà
L'Uffizi da construcziun auta dal Grischun ha inoltrà a la vischnanca da Cazas la dumonda da construcziun per il project da protecziun cunter aua gronda per il territori da la clinica Beverin sco er per ils dus stabiliments d'execuziun giudiziala. Questa dumonda vegn ussa examinada e publitgada pli tard. Gia quest atun duessan las lavurs da construcziun entschaiver. I dovra diversas adattaziuns vi dad auals existents, plinavant sto la Viafier retica construir ina nova punt. Tar il project sa tracti d’in uschenumnà project da protecziun da l'areal, quai vul dir ch'ils custs van cumplainamain a quint dal chantun.
Mesiras da la vischnanca politica
In auter project da protecziun cunter aua gronda è quel che pertutga il «Caznerbach». Tar quest project sto la vischnanca sa participar finanzialmain, quai vul dir che quest project sto vegnir approvà da la populaziun a chaschun da la radunanza communala dal preventiv 2024.