Tranter auter persequitescha il chantun ina strategia cun ina participaziun pli auta vi da l’energia electrica. Il schef dal Departament d’energia Mario Cavigelli ha ditg, che dapli che la mesadad da las concessiuns da forza idraulica scadian tranter ils onns 2035 – 50. Cavigelli ha ditg ch’i saja impurtant da gia oz lantschar las contractivas. Il chantun e tschertas vischnancas sajan per part gia oz vid contractar cun ils manaschis da la forza electrica. En la branscha d’electric giaja tut ditg ed ins stoppia sa preparar gia baud sin il futur. E temp dovria quai pervi dals divers process politics ed er pervi da l’infrastructura che stoppia per part vegnir adattada.
Dapli participaziuns
Fitg impurtanta saja la strategia da sa participar. Cavigelli ha ditg ch’el sa mettia avant in sistem sumegliant a quel dad oz, nua che las ovras electricas giajan en in partenadi. L’intent saja da cuntanscher ina bler pli auta participaziun dal maun public, nua che las vischnancas ed il chantun sa participeschian. La dumonda saja era tgi che vegnia a posseder en l’avegnir las ovras electricas, cura ch’ils contracts scadian. Cavigelli ha plinavant menziunà che la forza da l’aua saja la pli impurtanta resursa ch’il chantun haja.