Ina simulaziun d'in accident da l'AXA a Tusaun ha mussà a moda impressiunanta ils privels da la distracziun en il traffic. En in emprim scenari ha in auto cun ina sveltezza da 50 km/h pudì franar dal tuttafatg sut cundiziuns idealas e sa fermar gist avant ina marionetta ch'ha traversà in passape.
Ina secunda distracziun po esser gravanta
En in segund scenari è il manischunz vegnì distratg per mo ina secunda cun ina egliada sin ses telefonin. Questa curta nunattenziun ha manà ad ina franada retardada per ina secunda, uschia che l'auto ha tutgà il pop quasi senza franar. «Il privel d'ina blessura greva u schizunt d'in accident mortal è considerabel», declera Georg Collet, manader tecnic dal post da prevenziun tar l'AXA.
En la secunda ch'ins è distratg, va l'auto cun 50 km/h ina distanza da circa 14 meters.
Prevenziun impurtanta
In terz scenari ha mussà ch'ina sveltezza augmentada per mo 5 km/h avess manà ad ina collisiun senza franar cun la marionetta, quai ch'avess chaschunà blessuras mortalas. L'AXA vegn a duvrar il material video da la simulaziun per intents da prevenziun per render attent als privels, damai che la gronda part dals accidents cun blessads grevs capitan entaifer ils vitgs e la distracziun saja ina da las raschuns las pli frequentas.
-
Bild 1 von 4. Georg Collet è manader tecnic dal post da prevenziun da la segiranza AXA. Bildquelle: RTR.
-
Bild 2 von 4. Betg adina vegn in auto da frenar ad uras. Bildquelle: RTR.
-
Bild 3 von 4. Ils experts da la AXA cun la marionetta ch'è vegnida duvrada per il test da frenar. Bildquelle: RTR.
-
Bild 4 von 4. Qua è l'auto gist anc vegnì da frenar a duras. Bildquelle: RTR.
Or dil archiv