Ritter Ludwig von Schwitter-Elblingen, in directur d’ina scola d’elita, passenta sia pensiun en ina residenza da vegliadetgna. Malgrà dispitas cuntinuantas en il gieu Trivial-Pursuit, collia el cun ses trais abitants in’amicizia profunda. Sco luxus spezial emposta Ludwig la dumengia da mangiar da l’ustaria. Quel vegn mintgamai d’in giuven da furniziun ch’el cusseglia tar ses studi. Ina dumengia cumpara dentant empè dad el la giuvna Paula, in pau negligida, e Ludwig è tut auter che cuntent. Però per in pèr furniziuns dovra el l’agid da la dunna giuvna. Ed era Paula na sa lascha betg starmentar, perquai ch’ella ha era in giavisch ...
La «garda veglia» è puspè da la partida
L’autur dal toc è Stefan Vögel, el è naschì il 1969 a Bludenz e vala sco in dals pli brigliants auturs da cumedias en il spazi da la lingua tudestga. La reschissura dal toc è Lina Frei-Baselgia. Sco quai ch’ella ha ditg envers RTR, haja ella vis il toc en in teater a Hamburg. Ella haja spert vis che quai saja il toc ch’ella veglia preschentar qua. Pervi da corona haja dà divers spustaments, la rolla da Paula saja duas giadas vegnida occupada da nov, ussa gioga Ursula Schnellmann (27) la rolla da la rappunza. Plinavant giogan Renald Mathieu, Terzio Paganini, Maria Pasquale e Gion Pfister – els ch’èn per part gia dapi la fundaziun dal teater Muntanellas il 1978 commembers da l’uniun.
