Siglir tar il cuntegn

Header

Video
En praschun or da libra voluntad – lavurar en la praschun a Cazas
Or da Telesguard dals 02.12.2019.
laschar ir
cuntegn

Cazas Tignez En praschun or da libra voluntad

Nina Albin ed Isidor Derungs han gia lavurà en la praschun Sennhof a Cuira. Ussa han els fatg midada. Lur plazza da lavur nova è la praschun Tignez a Cazas.

Igl è ina praschun fitg moderna ed er ina da las pli segiras da la Svizra. Cameras, ischs e clavs tutgan tar il mintgadi dals 150 praschuniers. Confruntà cun las barrieras è però er il persunal.

Ina part da lur libertad persunala dattan Isidor Derungs e Nina Albin gia a l’entrada da la praschun. Il telefonin vegn serrà en in caum durant il di da lavur. En la praschun dovran els telefons interns.

Nus essan controllads dad A fin Z.
Autur: Isidor Derungs

Il spezialist per l’execuziun giudiziala, Isidor Derungs n’ha nagins problems da vegnir controllà, i saja ina chaussa da s’endisar. E sia collega Nina Albin, ch’è la manadra da la partiziun lavur ed economia en la praschun agiunta «Jeu na ma sent serrada en la praschun».

A maisa cun morders e laders

Il guardian Isidor Derungs passenta bler temp cun ils praschuniers. El sesa er a maisa cun ils umens ch’han engulà, assassinà u er violà.

«Jau enconusch lur istorgias, ma ellas n’interessan mai uschè ferm», di Derungs. «Els han lur chasti e nus na stuain chastiar els anc dapli». Il guardian saja qua per controllar e reglar, ma gista uschè impurtant saja il sustegn e l’accumpagnament. «Jau sun pli fitg psicolog che policist», di Derungs.

La finamira è la resocialisaziun

Nina Albin fa part da la direcziun da la praschun. Er ella ha ina finamira principala. En il center da la lavur en praschun stettia adina la resocialisaziun.

Natiralmain resocialisaziun è in grond pled. Ma sche ils umens na fan nagins delicts cur ch’els bandunan la praschun, lura avain nus cuntanschì insatge.
Autur: Nina Albin

Libertad preziusa

Libertads dettia be paucas per ils praschuniers che vivan bainbaud en la nova praschun a Cazas. Nina Albin ed Insidor Derungs san quai. Els apprezieschan tant pli lur pitschnas libertads persunalas dador ils mirs. «I tuna banal ma jau poss mangiar insatge cura ch’jau vul», di Nina Albin. Ed Isidor Derungs agiunta «A chatscha o a pestga patratg jau bleras giadas che noss praschuniers manchentan uschè bleras bellas chaussas».

RTR Telesguard 17:40