Siglir tar il cuntegn

Header

video
Center da sanadad a Savognin – Ils responsabels han infurmà
Or da Telesguard dals 07.11.2018.
laschar ir. Durada: 4 minutas 54 Secundas.
cuntegn

Grischun Central Center da Sanadad Savognin: Saira d’infurmaziun senza il directur

Pervi da diversas reproschas cunter il Center da Sanadad Savognin SA ch’èn cumparidas il davos temp en la publicitad, ha il Center da sanadad envidà la populaziun ad ina saira d’infurmaziun. Betg preschent è stà il directur Gion Cola. Dapi in’emna è el scrit malsaun.

Sco quai ch’igl è vegnì infurmà a la saira d’infurmaziun che radund 150 persunas han visità, hajan ils temps turbulents laschà enavos fastizs tar il directur. Quant ditg ch’il directur na possia betg lavurar e sch’el returna en ses post sco directur è il mument intschert. Durant l’infurmaziun hai dà divers votums che mettan en dumonda las cumpetenzas dal directur. Il manaschi operativ saja vinavant segirà, ha ditg Clemens Poltera il president dal cussegl d’administraziun: Ad interim surpiglian Christine Demarmels e Sandra Luzio il manaschi operativ.

Center da sanadad conceda sbagls

Plinavant ha Poltera ditg ch’i saja vegnì fatg sbagls il davos temp. Ins haja eruì flaivlezzas en l’organisaziun ed en la gestiun. Ord vista actuala ins haja per part reagì memia tard u memia pauc consequent. Diversas mesiras ins haja ussa gia realisà. Uschia saja la situaziun dals medis sa meglierada: Suenter ch’il schefmedi Stefano Corra haja surpiglià la gestiun dals medis saja puspè pussaivel da far termins senza lungs temps da spetga. En la direcziun haja dà ina reorganisaziun, uschia saja Christine Demarmels vegnida promovida en la direcziun: Uschia saja ella dasperas il directur la segunda persuna da contact tar dumondas dal persunal, quai saja vegnì prendì si positiv.

Reorganisaziun cuntinuescha

En l’avegnir ins vegnia a realisar autras mesiras, ed ins veglia infurmar intern sco era extern, uschia Poltera. Il pli impurtant saja ch’i regia puspè quietezza e constanza en l'ospital ed en la chasa d’attempads.

Quai che pertutga las desditgas da medis dal davos temp ha Poltera ditg, che dals otg schefmedis ch’hajan bandunà ils davos set onns il Center da sanadad, haja mo in medi survegnì la desditga dal Center da sanadad – tut ils auters sajan ids ord atgna voluntad. Davart la sortida da divers medis dal davos temp, n’ha Poltera betg prendì posiziun. En brevs da lecturs dal davos temp era vegnì crititgà, che bunas e buns medis hajan bandunà il spital pervi da la gestiun da l'ospital.

RR actualitad 07:00

Artitgels legids il pli savens