La midada da las tavlas ha custà radund 4’000 francs, ha ditg Roger Stäubli il viceinschigner chantunal. Ch’ins haja l’emprim scrit las tavlas d’infurmaziun en tudestg empè da rumantsch saja da manar enavos sin ina mancanza d’attenziun. En l’avegnir vegli'ins sche pussaivel resguardar la lingua da la vischnanca territoriala.
Uniun Rumantscha è cuntenta
L’Uniun Rumantscha Grischun Central è satisfatga ch’il chantun ha midà las tavlas: «Quella midada en rumantsch è puspè ina giada in mussament, che sche tut ils rumantschs tegnan ensemen, alura èsi pussaivel da cuntanscher la finamira».
Las tavlas ch’èn oriundamain stadas scrittas en tudestg èn era vegnidas crititgadas en ina brev da lecturs. Uschia na dettia quai betg il term Ronastutz, il term uffizial saja «Las Bovas da Rona».
RR actualitad 17:00