La radunanza communala da Churwalden ha approvà il quint annual da 2021 che serra cun in plus da passa 4,3 milliuns francs – quai tar entradas da stgars 21,5 milliuns ed expensas da bun 17,1 milliuns francs. Da schliar la corporaziun da vischnancas per la chasa da tgira Lindenhof saja stà il motiv principal per il resultat extraordinari bun, scriva la vischnanca. Mo da quest project resulta in plus da 3,3 milliuns francs.
Credits supplementars avant il start dal project
Cun ils custs da construcziun ch'èn creschids l'ultim temp ha la vischnanca proponì credits supplementars per la terza etappa da la renovaziun dal «Jochwäg Churwalden» e per l'emprima etappa dal schlargiament dal provediment cun aua «Brambrüesch». La radunanza ha approvà ils dus credits en la summa totala da 560'000 francs.
Elecziuns en cumissiuns
Ultra da quai ha Churwalden elegì la cumissiun dal project da meglieraziun per la «sanar e schlargia vias da transport Churwalden/Parpan».
- Bernardo Brunold (president)
- Niccolo Hartmann
- Luzius Raschein
- Mario Rubitschon
- Hubert Schneider
e la cumissiun da schazetg
- Gieri Caviezel
- Lieni Bärtsch
- Ernst Buchli (suppleant)
- Martin Bircher (suppleant)
- Hans Krättli (president, clamà dal departament chantunal)