Siglir tar il cuntegn

Header

cuntegn

Grischun Central Citad d’energia Alvra e Surses fusiuneschan

Las citads d’energia da la val d’Alvra e dal Surses sa preschentan da nov cuminaivlamain sut il num Citad d’energia Ela. Gievgia vegn surdà e festivà la surdada dal label a Savognin.

Sco quai che la Citad d’energia Ela scriva en ina communicaziun, han las tschintg vischnancas pertutgadas (Albula/Alvra, Filisur, Schmitten, Lantsch e Surses) cuntanschì 60% dals puncts ch’i dovra per survegnir il label – necessaris fissan 50%. Betg pli da la partida è Bravuogn che ha sistì la collavuraziun.

Quest tancadi per autos electrics a Savognin è vegnì fatg en collavuraziun cun la citad d'energia.
Legenda: Quest tancadi per autos electrics a Savognin è vegnì fatg en collavuraziun cun la citad d'energia. RTR, F. Belotti

Il program citad d'energia

Avrir la box Serrar la box
  • Quai è in program dad EnergiaSvizra che ha per finamira d’augmentar la qualitad da viver e proteger il clima entras in agir responsabel.
  • Il program è distincziun per vischnancas che persequiteschan ina politica d’energia ecologica - promovend energias regenerablas, ina mobilitad ecologicamain cumpatibla e nizzegiond resursas da maniera effizienta.

Differentas mesiras èn gia realisadas

Tenor in flyer ch’è publitgà en l’internet ha la Citad d’energia Ela differents projects exemplarics. Uschia retirian tut las vischnancas che fan part a la Citad d’energia Ela tut la forza electrica ord forza d’aua.

Differents bajetgs ch’appartegnian a la vischnanca sajan vegnids occupads cun pumpas termicas ed en differents lieus dettia quai staziuns per chargiar gratuitamain autos electrics.

Regiun duai vegnir anc pli ecologica

Ils proxims onns ha la Citad d’energia Ela las suandantas finamiras: Optimar il diever da forza electrica dals edifizis publics ils pli impurtants, motivar ils possessurs da segundas abitaziuns da reducir il stgaudament cura che l’abitaziun è vida e proveder fin l’onn 2020 almain 5% da la forza electrica en bajetgs da las vischnancascun forza electrica ecologica.

Artitgels legids il pli savens