En il discurs cun RTR ha Pauli Dosch ditg, ch'ins vuleva oriundamain dar il num FC Oberhalbstein al club. Pir suenter che scolasts hajan crititgà il num, hajan ins lura numnà il club CB Surses. Il scolast pensiunà Pauli Dosch è stà l’emprim president dal club, quest uffizì ha el gì durant 18 onns. El ha dentant er agì sco trenader per il club e fascheva era l’arbiter.
La plazza da ballape a Tinizong è vegnida construida per 323'000 francs. Da questa summa ha l’anteriura vischnanca da Tinizong pajà 100'000 francs. Radund 20'000 francs dals custs ha il club finanzià sez – quai cun daners ch’èn vegnids recaltgads cun ina festa d’avertura, sa regorda Pauli Dosch. A l’avertura sajan stadas bleras uniuns da la val, tranter quels perfin il club nautic da Surses, ch’i na dat betg pli.
Proxim gieu stat davant porta
Il proxim gieu dal Club da ballape da Surses è la sonda ils 24 d’october a las 17:00 sin la Plazza d’ava a Tinizong. Omaduas equipas èn davant en la rangaziun da la quarta liga.
Ord l'archiv:
Il 1981 è stada la gronda discussiun tge che duai vegnir fatg per ils indigens en il vitg da Savognin. A trais radunanzas communalas è vegnì decidì ch'i duai dar ina halla, ma davart ils custs èsi adina puspè vegnì discussiunà. La scola ha lura piglià sezza enta maun quai ed ha giugà ballape er d'enviern sin la plazza, nua che la halla avess duì vegnir bajegiada:
