Siglir tar il cuntegn

Grischun Central Co pon aczias simplamain sparir?

20 vaglias à 250 francs da la Pendiculara Razén-Veulden vegnan actualmain tschertgadas en il fegl ufficial dal chantun Grischun. L'annunzia da spariziun ha fatg la possessura ni il possessur da las aczias.

La pendiculara da Razén-Veulden parta gista or da la staziun a val.
Legenda: Vaglias sparidas da la pendiculara da Razén-Veulden vegnan actualmain tschertgadas da la dretgira districtuala Valragn. mad

Las aczias èn ubain idas a perder, èn vegnidas enguladas, ni èn vegnidas iertadas, n'èn dentant nagliur da chattar. Quai ha declerà Andreas Konrad dal tribunal districtual Valragn, ch'è respunsabel per las aczias da la Pendiculara Razén-Veulden. Perquai ha la possessura ni il possessur annunzià las vaglias sco sparidas. Vegnan ellas betg chattadas infra 6 mais, vegnan ellas annuladas.

Finamira è d'annular las vaglias

Tras l'annulaziun da las vaglias na van quellas dentant betg a perder per il possessur ni la possessura. Tras quai po la persuna numnadamain dumandar per novas vaglias.

Quai funcziuna dentant mo, sche la persuna è registrada en il register d'aczias da la firma, quai ch'è pir dapi il fanadur 2015 obligatoric per societads d'aczias betg quotadas a la bursa.

Cas Razén-Veulden

Tar il cas da las 20 aczias da la Pendiculara Razén-Veulden vesi ora bain per la possessura ni il possessur. Sco i ha num davart da la pendiculara saja la persuna enconuschenta sco acziunara e possia tras quai far quint da survegnir novas vaglias en in mez onn.

Decider quai sto dentant il tribunal districtual Valragn che ha da tractar tals cas duas enfin trais giadas mintg'onn.

RR actualitad 07:00