Radund 700 persunas da la Regiun Moesa sa participeschan vi d’in test serologic. Sco quai che la regiun ha communitgà ier a San Bernardino, è circa la mesadad da las persunas che fa il test persunal che lavura en il sectur da sanadad. Tar las emprimas persunas haja ins gia prendì sang. Plinavant sajan ellas sa participadas vi d’ina enquista.
En circa diesch dis duessan esser pronts ils resultads. Quels duessan mussar, sch’ils testads sajan stads infectads cun il coronavirus. I saja tgunsch pussaivel ch’i dettia persunas che sajan s’infectads cun il virus senza da s’accorscher sintoms, ha ditg il medi Franco Muggli ch’è responsabel per il studi. Cun ils tests che vegnan fatgs duess surtut il persunal medicinal pudair turnar cun dapli fidanza da sasez sin la plazza da lavur cun enconuscher il stadi d’immunitad.
