Cun il project approvà ils 4 da november 2009 davart la «installaziun d’in sistem da surveglianza sin il territori da la bova Caltgeras» ed ils projects «preavertiment 2011 enfin 2015», sco era la «survegliaziun e preavertiment 2016 anfignen 2019», èn vegnids installads plirs sistems da mesiraziun, che duevan registrar e survegliar ils moviments dal grip per cuntanscher ina meglra enconuschientscha davart ils process percurrids. Il project preschent descriva la successiun ed optimaziun da la fasa da manaschi per il spazi da temp da la mesadad da l’onn onn 2019 enfin il 2024.
Novas enconuschientschas èn dumandadas
Cun il sistem da surveglianza e d’avertiment duessan vegnir registradas las ratas dal moviment da la bova e dal sbuvaditsch, sco era cuntanscher ulteriuras enconuschientschas davart il mecanissem da moviment e la cinemateca da bovas e sbuvaditschs. Qua tras duess vegnir cuntanschida ina prognosa davart l’activitad da la crudada ed in avertiment eventual da gronds eveniments. Il sistem avertescha automaticamain tar in surpassament da la valur minimala. Ils avertiments vegnan interpretads da persunas dal rom e la vischnanca vegn orientada via cumissiun da segirtad.
Be pli in'urna per elecziuns e votaziuns
Plinavant ha la radunanza communala approvà la revisiun parziala da la lescha da votaziun e d‘elecziun. Da nov datti mo pli in‘urna a Casti durant las elecziuns e votaziuns. Cun quai scrodan las urnas che vegnivan installadas ad Alvagni, Alvaschagn, Brinzauls, Mon, Stierva, Surava e Casti, che stuevan vegnir survegliadas mintgamai da duas persunas. La suprastanza communala fa valair che 90% da las votantas e votants vuschan per posta.
Ultra da quai ha la radunanza communala decidì, da far las radunanzas communalas per regla mo pli a Casti.
RR novitads 06:00
