Siglir tar il cuntegn

Header

cuntegn

Critica per Ziràn-Reschen Refusar il dretg da burgais n'è betg stà giustifitgà

La vischnanca burgaisa da Ziràn-Reschen aveva refusà il 2020 la natiralisaziun d'in burgais tudestg. La raschun sajan stadas supposiziuns ch'el saja datiers al circul dals uschè numnads «Reichsbürger». La radunanza da burgais ha sin quai refusà la dumonda da natiralisaziun - e quai senza discussiun. Uss ha il Tribunal federal decis che quella decisiun n'è betg stada giustifitgada.

Uffizi da migraziun sceptic

Suenter avair fatg pliras retschertgas è l'Uffizi da migraziun e dretg civil dal Grischun stà sceptic da dar il dretg da burgais a l'um da la Germania. I na saja betg segir sch'el acceptia las valurs da la Constituziun federala. Tar in'emissiun dad SRF «Rundschau» saja el stà ad ina manifestaziun organisada dals «Reichsbürger». Tar quella haja era dà snegaziuns dal Holocaust.

Ils responsabels da la vischnanca burgaisa han discurrì cun il candidat ed avessan acceptà sia dumonda, cun l'argumentaziun ch'ins na possia betg demussar insatge concret ad el. Auter ha la radunanza da burgais vis quai e refusà la dumonda da naturalisaziun senza discussiun – era sche la suprastanza ha cusseglià d'acceptar la dumonda.

Uss èn puspè burgais vidlonder

La decisiun n'ha il Tudestg betg acceptà ed è sa dustà, surtut perquai ch'el n'ha betg survegnì in'argumentaziun. Cun raschun, di il Tribunal federal. La radunanza da burgais avess stuì discussiunar davart la dumonda u far ina cuntraproposta. Omadus na saja betg capità e perquai ston ils burgais da Ziràn-Reschen uss anc inagiada s'occupar da quest tema e pajar a l'um 4'000 francs indemnisaziun.

RTR novitads 16:00

Artitgels legids il pli savens