Siglir tar il cuntegn

Header

video
Il Cube a Savognin è serrà – ils abitants èn surprais
Or da Telesguard dals 17.09.2018.
laschar ir. Durada: 2 minutas 19 Secundas.
cuntegn

Grischun Central Cube a Savognin è serrà

Il pli grond hotel da Savognin è entant serrà. Bleras dumondas restan però anc avertas.

Il glindesdì ch'il hotel è vegnì serrà èsi stà quiet sin l’areal dal Cube. Singuls collavuraturs èn stads denturn, ma els n'han betg pudì discurrer cun las medias.

Gia ordavant n'aveva il mainafatschenta Gerfried Gaugelhofer betg vulì dar scleriment ad RTR, el haja già avunda problems da schliar. Quants collavuraturs ch’èn pertutgads e tge che capita cun els, resta avert.

L'annunzia nunspetgada ch'il hotel Cube serra sias portas ha procurà per consternaziun en la regiun da Savognin.

Cun ses 270 letgs saja l'hotel Cube actualmain l'hotel cun ils pli blers letgs e perquai fissi fitg impurtant che quel hotel fiss avert, di il president da la vischnanca da Surses Leo Thomann a RTR.

A la vischnanca Surses èn liads ils mauns

Dentant – a la vischnanca èn liads ils mauns. Cun quai ch'ella na saja betg participada en l'acziunariat da l'interepresa, na possia ella er betg decider insatge tar la S1 HotelerrichtungsAG che maina il Cube.

Nus pudain sin il pli giavischar, che l'hotel vegnia puspè avri.
Autur: Leo Thomann president da vischnanca, Surses

Uss spera la vischnanca ch'ins chattia ina soluziun per che l'hotel possia puspè avrir, di Leo Thomann, il president da la vischnanca da Surses

Ferma frida per il turissem

Er per l'interpresa Turissem Savognin Bivio Alvra SA n'èn las raschuns da serrar il hotel Cube betg cleras, di Daniel Fischer, il president dal cussegl d'administraziun da l'organisaziun turistica. Da serrar il hotel saja ina ferma frida scriva l'organisaziun da turissem en ina communicaziun. Il hotel saja in garant per letgs chauds.

audio
Saira: Cube a Savognin - posiziun da Daniel Fischer
ord Actualitad dals 14.09.2018.
laschar ir. Durada: 3 minutas 54 Secundas.
Quai era ina surpraisa per nus, surtut er pervi da la curta vista e la mancanza dad integrar ils partenaris al lieu.
Autur: Daniel Fischer Turissem savognin Bivio Alvra SA

Er la Turissem Savognin Bivio Alvra SA tschertga il discurs cun Rudolf Tucek per chattar perspectivas ed auters nizs per il Cube. Els sperian che la decisiun da l'acziunari principal Tucek na saja betg definitiva.

audio
Saira: Discurs davart la fin dal hotel Cube
ord Actualitad dals 13.09.2018.
laschar ir. Durada: 3 minutas 53 Secundas.

Cundiziuns da basa na constettian betg pli

Sco quai che Tucek ha ditg envers RTR na constettian las cundiziuns da basa betg pli. Las premissas per realisar il model da fatschenta na correspundian betg pli a sias ideas.

Il Hotel Cube cun vista sin il Lai Barnagn.
Legenda: L'hotel Cube cun vista sin il Lai Barnagn. RTR, Federico Belotti

Reservaziuns vegnan annulladas

Per ils giasts ch’han reservaziuns pendentas per quest atun e l’enviern, tschertga l'hotel ina schliaziun da pernottar en in auter lieu.

Cun l'hotel Cube serra er affar da sport Cube

Betg mo il Hotel Cube ha serrà sias portas, mabain er l’affar da sport Cube Active. Cunquai manchia ina impurtanta purschida da pigliar a tschains vehichels sco velos, trottinet e Go-Karts per la muntogna, uschia l'uniun turistica.

audio
Mezdi: Tge purschidas ch’èn periclitadas senza Cube
ord Actualitad dals 14.09.2018.
laschar ir. Durada: 2 minutas 51 Secundas.

Affittar vehichels da sport pon’ins era tar ils auters affars da sport da Savognin. Organisar a curta vista ina purschida supplementara saja dentant grev, han ditg il manader da fatschenta dal Bananas Sport Shop ed il manader dal Wasescha Sport.

RR novitads 11:30

Artitgels legids il pli savens