Siglir tar il cuntegn

Grischun Central Cuira - art en il spazi public

Art e musica vegnan ad esser d'enturn a Cuira durant l'entira stad e duain era esser palpabels. «El lieu» u «Am Ort» sa numna quest nov project d'art da l'uniun Art-Public, che ha gia trais giadas realisà in tal project a Cuira.

Legende: Video Art en il spazi da Cuira abspielen. Laufzeit 00:37 Minuten.
Or da RTR dals 27.05.2016.

Il project «El lieu» duaja surprender, irritar ed animar da patratgar, declera la presidenta da l'uniun Art-Public, Alda Conrad-Lardelli. Las singulas ovras èn repartidas en la citad da Cuira: «Il mintgadi da la glieud duai vegnir interrut cun art ch'ins entaupia uschiglio mo en museums.»

Dus tips da visitaders

La finamira saja che la glieud s'occupeschia cun l' art en il spazi public, dentant er cun il spazi public sco tal, declera il curatur dal project, Luciano Fasciati. Il project duai cuntanscher differents tips da visitaders. D'ina vart quel che s'interresseschia per art e veglia vesair l' entir'exposiziun.

«Lura datti dentant er ils visitaders che van vi. Glieud che stat airi, posescha e fotografescha. Quella glieud furma er in agen maini u emprova d' interpretar l' ovra», uschia Fasciati.

Part musicala è nova

Ina part dal project è tenor Fasciati l'art en il spazi public. En in'autra part vegn era il bus da Cuira duvrà sco lieu per art. Ina nova part ch'è vegnida vitiers cun la terz'ediziun dal project è la part musicala. Tar las ovras d'art datti er culissas da ramurs. Dasperas datti er anc cumposiziuns ed improvisaziuns musicalas.