Il project «El lieu» duaja surprender, irritar ed animar da patratgar, declera la presidenta da l'uniun Art-Public, Alda Conrad-Lardelli. Las singulas ovras èn repartidas en la citad da Cuira: «Il mintgadi da la glieud duai vegnir interrut cun art ch'ins entaupia uschiglio mo en museums.»
-
Bild 1 von 7. «Drifted pit, OI#16231», sa numna l'ovra da Bob Grasma. Bildquelle: RTR, G. Gabriel.
-
Bild 2 von 7. Gia per la segunda ga ha igl artist Roman Signer elegì la radiella en il parc da fontana per sia installaziun. El ha construì in cilinder da lain che circumdescha la radiella. Bildquelle: RTR, G. Gabriel.
-
Bild 3 von 7. Il duo d' artists Markus e Reto Huber han repartì 40 chasettas d' utschels el center dalla citad da Cuira. Las chasettas èn orda materials che pon vegnir reciclads. Bildquelle: RTR, G. Gabriel.
-
Bild 4 von 7. En il Bärenloch ha il duo d' artists Frölicher e Bietenhader montà prints digitals, che mussan in bizarr mund da maletgs. Bildquelle: RTR, G. Gabriel.
-
Bild 5 von 7. Ils prints consistan da maletgs da Google Earth. Bildquelle: RTR, G. Gabriel.
-
Bild 6 von 7. Quest'ovra da Barbara Signer e Michael Bodenmann cun il num «Neumarkt» avev'oriundamain la funcziun d'in purtader da reclamas. Bildquelle: RTR, G. Gabriel.
-
Bild 7 von 7. Evelina Cajacob ha malegià in' anza infinita giun plaun el passadi tranter il Plaz dal Teater e la Zeughausstrasse. La colur è la medema che vegn duvrada per marcar las vias. Era tar stgirezza vesan ins l'anza. Bildquelle: RTR, G. Gabriel.
Dus tips da visitaders
La finamira saja che la glieud s'occupeschia cun l' art en il spazi public, dentant er cun il spazi public sco tal, declera il curatur dal project, Luciano Fasciati. Il project duai cuntanscher differents tips da visitaders. D'ina vart quel che s'interresseschia per art e veglia vesair l' entir'exposiziun.
«Lura datti dentant er ils visitaders che van vi. Glieud che stat airi, posescha e fotografescha. Quella glieud furma er in agen maini u emprova d' interpretar l' ovra», uschia Fasciati.
Part musicala è nova
Ina part dal project è tenor Fasciati l'art en il spazi public. En in'autra part vegn era il bus da Cuira duvrà sco lieu per art. Ina nova part ch'è vegnida vitiers cun la terz'ediziun dal project è la part musicala. Tar las ovras d'art datti er culissas da ramurs. Dasperas datti er anc cumposiziuns ed improvisaziuns musicalas.