Siglir tar il cuntegn
Inhalt

Grischun Central Cun il chavrer da Stierva sin viadi en il passà

«Tge bela vet’è chella per me tg’i sung tgavrer...». Uschia cumenza in’enconuschenta poesia surmirana. E da la vita dal chavrer raquinta er il nov cudesch «Igl tgavrer». I sa tracta d’ina istorgia pli lunga dal scrivent popular Gion Antona Candreia da Stierva ch’è ha vivì dal 1902-1980.

Persunas che preschentan in cudesch.
Legenda: Da dretg: Hans Friberg, Roswitha Demarmels, Linard Candreia, Gian Andrea Walther. RTR, Esther Krättli

Gion Antona Candreia era pur e rasteller. El ha scrit lirica e prosa («Schi grond è chel pitschen mond», 1974), en la quala el tematisescha la vita dals purs ed originals sco era ils usits dal Surses. Sia chasa paterna, la «Tgesa rasteler», sa chatta a Stierva ed è oz in pitschen museum.

Linard Candreia da Laufen ha tgirà l’ediziun cun l’istorgia da ses schensch. Quella sa preschenta en las linguas rumantsch surmiran da Stierva, talian e tudestg. Ins vegn a savair bler da la vita simpla da pli baud. Illustrà è il cudesch cun maletgs dal pictur artist Ludwig Demarmels (1917-1992) ch‘è medemamain da Stierva. Ses dissegns da chauras dattan al cudesch ina tempra autentica.

A la preschentaziun dal cudesch «Igl tgavrer/Il capraio/Der Geisshirt» da la dumengia suentermezdi, han tranter auter fatg part l'autur Linard Candreia, Gian Andrea Walther (versiun taliana), Hans Friberg (nev da Gion Antona Candreia) e Roswitha Demarmels (dunna dal pictur Ludwig Demarmels).

RR actualitad 08:00