Siglir tar il cuntegn

Header

audio
Stad cun velo: Christian Hassler da viadi cun in velo solar
Or da Actualitad dals 17.08.2022.
laschar ir. Durada: 4 minutas 34 Secundas.
cuntegn

Cun RTR sin viadi Sin tura cun in velo solar

En sasez n'èsi betg da surstar che gist el è da viadi cun in velo solar: Christian Hassler da Donat. Il sulegl accumpogna el quasi schon si‘entira vita. Passa 30 onns ha el gì ina fatschenta per energia solara. Entant è el pensiunà ed ha temp per ir sin viadi.

Il vehichel è ina construcziun che Christian Hassler ha per part fatg sez. Sin la chista davant dad in cargo bike ha el montà ina cella solara dad 1m sin 1,65m. Ils indrizs tecnics ha el construì sez. Cun bagascha e tut paisa il velo circa 50 kg. Il sulegl che glischa sin la cella solara producescha l'energia per il sustegn e parallel vegn la battaria chargiada. Natiralmain stoppia el er dar sez in zic en ils pedals.

Jau hai simplamain in plausch dad esser en viadi cun mes velo solar.
Autur: Christian Hassler da viadi cun velo solar

Ir cun velo saja super, di Christian Hassler. Sch’in saja uras sin il velo as possia ponderar bain. I na saja betg memia plaun, betg memia spert e mintgatant era in zic monoton. Quai fetschia interessant l'entira chaussa. Per el giaja era per empruvar tge che saja tut pussaivel cun energia solara. Sch'el haja bun sulegl, alura possia el teoreticamain ir a perpeten. Lura sajan quai autras chaussas che dian ad el ch'i saja avunda, per exempel il mal il tgil. Sche la battaria è ina giada vita fa el in’urella siesta e lascha chargiar ella en il sulegl.

Nagin plan fix

La ruta da ses viadi da 10 dis ha Christian Hassler mo planisà da grop: Tessin, Berna e Valais. Nua ch'el va alura propi vegn adina decidì suenter maun. Vers saira guarda el mintgamai per in lieu per star sur notg. Quai po esser ina chombra en ina pensiun u in hotel, in campadi u simplamain in bel lieu per far in bivac. Il satg da durmir e la blatga ha el adina per maun. Uschia ha Christian Hassler per exempel durmì a Gletsch sut tschiel avert. Sin ses viadi ha el visità amis ed amias, dentant er gì inscunters interessants cun persunas estras.

Attirasguard

In velo solar na vesan ins betg mintga di sin via. Christian Hassler e ses vehichel dattan en egl. Natiralmain provocheschia el era quai in zic. Correspundentamain sajan er las reacziuns da la glieud. Sch'el sa fermia, vegnia la glieud a guardar e cun quai sa dettian interessantas discussiuns.

La tematica da l'energia solara è usche actuala sco anc mai.
Autur: Christian Hassler da viadi cun velo solar

El haja schon emprais d'enconuscher ina massa glieud. Christian Hassler ha gugent las discussiuns cun la glieud. Per part na possia la glieud betg chapir che quai funcziuneschia propi. Ed er Christian Hassler è suenter avair s'occupa tants onns cun solar anc adina fascinà ch'el po ir patgific si dad in pass cun agid dal sulegl.

RTR actualitad 08:00

Artitgels legids il pli savens