Cunter - Engulà charn e daners or da butia purila

Cun quai che la butia purila vegnia survegliada cun ina camera, quintava la pura e mazlera ch’i saja pussaivel d’eruir ils delinquents. Ma purtà haja la camera la fin finala nagut cun quai ch’ella saja stada rutta. Ussa veglia ella investir en ina nova camera, per la proxima giada esser preparada sin in enguladitsch. Ma ella spera che quai na capitia mai pli.

Plitost paucs problems cun laders

RTR ha fatg ina pitschna enquista tar puras e purs ch’han butias purilas, e quai a Savognin, a Cunter ed a Riom. Experientschas cun enguladitschs han prest tut ils dumandads gia fatg, savens saja il donn però stà pitschen. Sybille Uffer da Cunter di ch’il 2016 saja ina giada vegnì engulada la bursa, e la fin da l’onn possia quai schon ina giada dar ina differenza da 100 francs. Ma en general saja la glieud sincera.

Betg pajà rauba engulada

Tar Isabella Collet a Riom hajan ins ina giada pudì traplar in lader, e quai cun agid d’ina registraziun da video e cun agid da la polizia. Perquai ch’igl era ina persuna da l’exteriur, na saja però betg stà pussaivel da vegnir tar ils daners.

Traplà divers laders

Gion Peder Cadotsch da Savognin ha gia traplà daplirs laders en sia butia purila nua ch’el venda era charn da chatscha. Mo ina giada na saja betg grategià dad incassar ils daners. Cun la registraziun da la camera haja el fatg fitg bunas experientschas. Ina giada haja el pudì ir a chasa d’in pèr ad incassar ils daners betg pajads. Quels hajan dà tiers l’enguladitsch e pajà.