Siglir tar il cuntegn

Grischun Central Curdin Capaul è nov president da l'ospital da Tusaun

La radunanza da delegads da l'ospital ha elegì in nov president e Sara Balzer en il cussegl da fundaziun.

Curdin Capaul, il nov president da la fundaziun da l'ospital Tusaun.
Legenda: Curdin Capaul, il nov president da la fundaziun da l'ospital Tusaun. RTR, Federico Belotti

Ils delegads da la regiun d'ospital Mantogna/Tumleastga/Valragn/Alvra han elegì a Curdin Capaul sco nov president da fundaziun. Capaul ch'è stà fin qua vicepresident succeda a Roland Weber ch'è sa retratg il cumenzament da quest onn. Nova commembra dal cussegl da fundaziun è Sara Balzer dad Alvra, quai scriva l'ospital en ina communicaziun.

Reorganisaziun da la staziun d'urgenza

La radunanza da delegads da l'ospital Tusaun ha approvà il nov project d'investiziun dad 1,2 milliuns francs, per la reorganisaziun da la partiziun d'urgenza. Plinavant ha la radunanza concedì d'introducir ina contribuziun da refinanziaziun. Quai pervi da la perdita da liquiditad entras las investiziuns grondas dals ultims onns. Cun la contribuziun vegn evità che las vischnancas ston pajar dapli per l'ospital.

Dapli tractaments ambulants

Ultra da quai han ils delegads approvà il quint dal 2017. Quel serrà cun in deficit da passa 570'000 francs. Budgetà era in deficit da 500'000 francs. Sco raschun per il surpassament dal deficit budgetà numna l'ospital che adina dapli tractaments vegnian fatgs ambulant e betg pli staziunar.

RR novitads 12:00