Sco gia avant in mais ha la seduta dal cussegl communal da Vaz gì lieu via «livestream». Manà ha quella Maurin Malär, el che stat al timun da quel gremi cun 15 commembers e commembras. S’occupà è il cussegl communala cun la revisiun parziala pertutgant la planisaziun locala, la zona da l’aua e da privels.
Dumondas hai dà quai che pertutga il scumond da bajegiar en las zonas da l’aua e da privel. Er las distanzas ch’ins ha da tegnair en la zona da l’aua, tut tenor zona tranter 11 meters e 19 meters distanza davent da l'aual u dal lai. Vias existentas e bajetgs existents per exempel restan er cun adattar la lescha a las ordinaziuns dal chantun.
En connex cun quella revisiun parziala èn vegnidas inoltradas a la vischnanca 17 dumondas. Sin fundament da quellas posiziuns èn vegnidas fatgas tschintg midadas. Cun 13:1 vuschs ha il cussegl communal acceptà las revisiuns parzialas per mauns dal suveran che decida a l’urna.
Er auters duessan profitar
Strusch discussiuns hai dà tar la tractanda lescha generala da las taxas communalas. I va betg per la midada da las summas da taxas u per auzar quellas, mabain plitost è quella lescha ina midada formala. La lescha duess esser la basa fundamentala, formala e giuridica per la regulaziun da l’incasso da taxas da la vischnanca da Vaz.
Diversas decisiuns da la dretgira administrativa conferman ch’ina tala lescha fundamentala e legala saja necessaria per la vischnanca. Suenter ch’il cussegl communal ha approvà unanimamain quella lescha, ha il suveran anc il davos pled.
Glisch verda ha il suveran era da dar per in’agiunta tar la lescha da l’ovra electrica Vaz (EWO). Profitar da la purschida da la «Lenzerheide connect», quai che pertutga meglras lingias da telecommunicaziun ed er auters servetschs duess quasi mintgin, sa chapescha cun pajar per quel servetsch.
Enfin ussa han ins 18 clients che pajan per las lingias digitalas enfin 220 francs al mais, tut tenor grondezza e capacitad da la lingia. La dumonda per quel servetsch è avant maun er dad autras vischnancas, da blers affars indigens, dad auters lieus e da pliras persunas privatas.
Roger Federer fiss stà pront
Sut varia ha Elisabeth Sigron-Cantieni, ella che maina il departament da scola ditg, che suenter il glindesdi passà hajan ins puspè entschet cun la scola a Lai ed a Zorten. Passa dus mais han ins er gì a Vaz instrucziun virtuala sin distanza ed enfin dumengia passada anc vacanzas.
Dals emprims dis da scola suenter il coronavirus dastgian ins far ina bilantscha positiva, ha punctuà Elisabeth Sigron-Cantieni. Or dal mez da la seduta è vegnida ludada la nova plazza da giugar a Lain. Uffants e geniturs fetschian ferm diever da quella. Aron Moser, il president communal da Vaz ha ditg, che Roger Federer fiss stà pront d’inaugurar quella, quai che fiss bain stà insatge singular. Pervia dal coronavirus saja dentant stà da renunziar a l’inauguraziun uffiziala da la plazza da giugar a Lain.
Agens placats
Aron Moser ha er menziunà ch’ina giada a l’emna s’inscuntra la «taske force» dal turissem, instradada aposta per chattar bunas soluziuns areguard il coronavirus e la stad turistica 2020 a Lai e conturn. Mintga giast saja fitg bainvis ed ins veglia en nagin cas far tema als giasts. Ultra da quai duessi dar uschè paucs scumonds sco pussaivel, ha ditg Aron Moser.
Da preschent dovrian ins gia ils placats che fetschian attent a las directivas pervia dal coronaviurs. Placats ch’ins haja fatg da nov e cunzunt pli amabels che quels da l’Uffizi federal da sanadad.
In tema è er stada la lescha da paus. A Lai datti ina gruppa che vuless anc adina tegnair avert las butias ed ils affars dals firads «gronds» sco Nadal e Pasca. Aron Moser ha ditg ch’ina retschertga confermia ch’in terz dals patruns dals manaschis na vuless betg tegnair avert, in terz saja da l’avis ch’ins avess d’avair avert ed in terz saja da l’opiniun che tscherts firads fissan meglier da laschar avert ils affars.
Il president communal ha fatg attent e ditg ch’avant trais onns haja il suveran acceptà la lescha da paus ed i na fetschia strusch senn da midar quella danovamain. Cler saja ch’il matg ed il november dastgian las butias er la dumengia betg avair avert.