Il pli tard il mars da l’auter onn duess vegnir votà davart igl model da direcziun, ha il chanzlist Johann Gruber ditg envers RTR. I saja impurtant da pudair tegnair en quest termin, perquai che las elecziuns communalas sajan planisadas per l’avust dal 2021. Ina cumissiun dal cussegl communal è gia elegida, quai èn Christoph Messmer e Dominik Büchler, dus dals sis moziunaris. Els elavureschan ussa in project da votaziun che prevesa ina revisiun da la constituziun communala.
La suprastanza communala da Vaz è per il model da direcziun. Quel saja pli effizient, cunquai ch’ils duairs strategics ed operativs fissan en l’avegnir reglads pli cler. En la constituziun pudessi dar anc in’autra midada: Anc quest mais duess vegnir votà davart ina prolungaziun da la perioda d’uffizi da trais sin quatter onns.
