Deponia da Savognin vegn sanada per quasi in milliun

La radunanza communala da Surses ha decidì da sanar la deponia Davos Fallung a Savognin per totalmain 950’000 francs. Da nov vegn la deponia equipada cun electricitad, la via d'access vegn catramada ed i dat in suttetg per las boxas da rimnada da metal, aluminium e veder.

La deponia da Davos Fallung daventa pli moderna. Bild in Lightbox öffnen.

Legenda da maletgs: La deponia da Davos Fallung daventa pli moderna. RTR, Federico Belotti

Toni Sonder da la suprastanza da Surses declera las midadas a Davos Fallung. Avrir maletg en lightbox.

Legenda da maletgs: Toni Sonder da la suprastanza da Surses declera las midadas a Davos Fallung. RTR, Federico Belotti

Era approvà da la radunanza communala è vegnì in credit da budget da 270’000 francs per la quarta etappa da la sanaziun da la via chantunala a Rona Sura. Ultra da quai è vegnì decidì d'abolir la lescha da viturins a Savognin.

Naginas midadas dal pe da taglia

Il pe da taglia da la vischnanca da Surses resta vinavant sin 100% da la taglia chantunala simpla.

Approvà preventiv dal 2018

Il preventiv dal quint da gudogn e sperdita mussa in plus da 1’581’300 francs. Il preventiv dal quint d’investiziun prevesa expensas da 9’146’000 francs ed entradas da 2’110’000 francs, tge che munta investiziuns nettas budgetadas da 7’036’000 francs. Tranter auter èsi previs da sanar la plazza da ballape a Tinizong, a Savognin duain vegnir construids parcadis sutterrans, l'infrastructura dal lai Barnagn a Savognin duai vegnir sanada ed a Somtgant duai vegnir construida ina via per bikes da muntogna.

Nov policist communal e cumandant pumpiers

Plinavant è vegnì infurmà a la radunanza communala che Giatgen Thomann daventa il nov policist communal a partir da l'emprim da december, e che Orlando Caspar daventa il nov cumandant dals pumpiers dal Surses a partir da l'entschatta da l'onn proxim.

RR novitads 06:00