Nus vivevan fortunads en noss pajais – en nossa bella citad! Charkiv è la segund gronda citad da l’Ucraina, cun dus milliuns persunas da differentas naziunalitads e da differentas religiuns – Ucranais, Russ, Gidieus, Armens etc. I dat qua ina gronda quantitad dad universitads, e blers students e studentas da differents pajais vegnan a studegiar en nossa citad. Charkiv è la citad che cunfinescha cun la Russia. Ina gronda part da la populaziun discurra russ. Ed i dat bleras famiglias internaziunalas, damai famiglias maschadadas. Mia famiglia è ina da quellas.
Jau sun adina stada ina persuna che s’occupava pauc da politica, jau carteva adina che en il 21avel tschientaner chattia la glieud cuminaivlamain ed en mintga occasiun ina cuvegnientscha. Uschia viveva jau cuntenta e fortunada, ed jau fascheva mes plans.
Quai na pon bain betg esser fieus artifizials – la damaun da las 5:00 …
Jau vegn però a ma regurdar per adina da la damaun dals 24 da favrer 2022 – cura che jau sun vegnida dasdada dad explosiuns. «Quai na pon bain betg esser fieus artifizials – la damaun da las 5.00 …», hai jau pensà. Jau era surpraisa ed er indignada da questa canera. Ed jau n’hai betg realisà che la guerra aveva gist entschet en quel mument …
Las novitads èn lura arrivadas sco in schoc per tuttas e tuts. Jau n’era betg buna da crair. Quai na po bain betg esser! Però igl era la realitad.
Durant quella notg eran las explosiuns d’udir lunsch davent da noss quartier. Mintgina e mintgin crajeva che tut vegnia a chalar prest. Però vegnivi la damaun sajettà e bumbardà anc pli intensivamain. La glieud ha entschet immediat a far provisiuns. Davant ils tancadis e davant las apotecas hai dà colonnas adina pli lungas. Intginas stizuns ed apotecas n’han gnanc pli avrì quel di. Sin via era anc adina blera glieud – e mia mamma è perfin ida or a spass cun ses chaun.
Tuttina èn vegnids endrizzads ils tschalers da protecziun en las chasas – e blera glieud è sa rendida en quels per spetgar ch’il bumbardament chalia. Ils blers durmivan però anc adina en lur letgs.
Il terz di da la guerra ha lura però entschet cun ina explosiun terribla ed in incendi. La raschun era stada ina granata explodida en nossa vischinanza che aveva er anc dà fieu ils autos. Quai ha fatg tema – e quella ha limità immediat noss radius. Nus avain avrì noss tschaler ed avain cumenzà da ir giu en quel durant ils bumbardaments. Nus udivan trasora explosiuns. En contact cun auters pudevan nus chattar ora tgenins quartiers da la cita che vegnivan gist prendids en mira. Igl è terribel! Malapaina ch’ils bumbardaments tschessan, scrivain nus a parents ed amis per dumandar: «Co vai a vus?» E nus survegnin la resposta: «Nus essan en vita!»
Mia mamma lavura sco scolasta. En la gruppa da lur classa vegni era communitgà tranter uffants. Mia mamma legia e crida … Uffants en la vegliadetgna da 10-11 onns scrivan in a l’auter. Els emprovan da dar confiert a quellas e quels ch’han ferm tema. Insatgi ha scrit ch’ils geniturs dian che tut saja bainbaud finì. E la matta dumonda: «Vul quai dir che nus vegnian tuts a murir?» Mia mamma emprova da sustegnair e da quietar ses scolars.
Igl è privlus en la citad. Els han entschet a sajettar rachetas. Quai è il pli mal! Destrucziun enorma – per part er pervi da las undas da pressiun. I n’è betg pli segir da durmir en nossa chasa. Perquai pudain nus ir en il grond tschaler da la clinica gist dasperas.
Nus currin lura a chasa, per ans stgaudar e per baiver in té.
Questa clinica n’è anc betg bajegiada a fin, porscha tuttina bun ricover: Las paraids na stremblan betg ed ins n’auda betg uschè savens las explosiuns. La notg èsi fitg fraid en il tschaler, el n’è betg stgaudà. Però igl è almain illuminà. Nus spetgain mintgamai sin il proxim di, sperain ch’il scumond da sortir vegnia abolì e che las explosiuns fineschian. Per il solit èsi la damaun in pau pli ruassaivel … Nus currin lura a chasa, per ans stgaudar e per baiver in té. Nus empruvain da durmir, però betg en noss letgs, mabain sin il fund dal pierten. I vegn ditg che quai saja pli segir. Ma blers bandunan di per di la citad da Charkiv. Tgi ch’ha l’occasiun, va en ils vitgs dasperas ubain en in’autra citad. Quai è fitg depriment. E perquai ponderain era nus dad ir davent …
Charkiv! Mia bella ed amada citad da Charkiv è en muschna. Anc adina na vul mes chau betg acceptar la realitad. Tut para dad esser in lung e tementus siemi! Jau giavischass uschè ferm da pudair sdasdar en la vita d’avant, la vita d’avant la guerra!
Ils bumbardaments or da l’aria vegnan adina pli frequents. Dapi trais dis na datti nagina glisch pli. E lura er betg pli aua. Perquai avain nus decis da partir – ils 5 da mars 2022. A revair mes dachasa … la chasa, en la quala han vivì generaziuns da mia famiglia. Jau crai che jau vegnia a turnar – che ti Charkiv vegns a surviver!
