Era cun las novas restricziuns ch'il Cussegl federal ha decretà per occurrenzas publicas pon ils organisaturs manar vinavant ils dis da film che cuzzan enfin dumengia saira.
50 enstagl da 100 visitaders
Tut las prescripziuns d'igiena necessarias adempliva il festival da films cun ses concept da segirtad gia avant ch'il Cussegl Federal ha fatg reglas pli severas.
Nus essan propi stads fitg fortunads, che nus na stuain betg annullar dal tut il festival
Sulet il dumber da giasts sto anc ina giada vegnir limitads. En la sala da kino ch'ha plaz per 200 persunas, dastgavan cun las mesiras previsas mo la mesadad dals plazs vegnir occupads. Ussa vegn quai dumber anc ina giada scursanì. Tge effect che la restricziun da giasts ha sin il quint final dal festival da film a Tusaun, na sa la commembra dal comité d’organisaziun, Flurina Badel, betg dir.
Corona ha era avantatgs
La crisa da corona ha dasper ils blers dischavantatgs era procurà per novaziuns.
Finalmain avain nus dumagnà d’organisar la vendita da bigliets online. Quai era insatge che nus levan far gia dapi 5 onns. Igl è stà ina chaussa in pau cumplitgada.
La gastronomia è medemamain vegnida restructurada. Da nov fan las bleras ustarias da Tusaun part al concept da restauraziun. Las novaziuns vegnan manadas vinavant era per las proximas ediziuns dals dis da film mundials a Tusaun.